Les Pages Jèrriaises

À la campangne

Y'a tchique temps, j'eus l'grand pliaîsi dé travailli auve la fanmil'ye d'ma bouonnefemme et siez mes bieaux-pathents, dans un clios dans tchi qu'i'y'avait un grand bouais, ses branques  pendant par-d'ssus la route. Man bieau-péthe, qu'a huiptante-quatre ans, l'avait fait abattre, et sa fil'ye, deux d'ses trais fréthes et mé, j'avions l'travas d'coper toutes les branques.
 
Il affilit la scie à chaîne et deux sèrpieaux et mêlit la fouaille, et nos laîssit à scier et tranchi. Heutheusement, j'avais un mio d'expéthience et j'pouvais lus aîdgi. Entre nous, duthant trais heuthes d'cop'sie, d'êmondage et dé traîn'nie, j'fînmes deux grands tas, iun auve les p'tites branques à fielles et l'aut' des grandes bûches. Nou s'en va brûler un mio du preunmié tas, mais lé s'gond, P'pèe s'en va laîssi as'tchi duthant deux ans d'vant les scier en choutchets pouor les brûler duthant les veilles d'hivé.
 
Quant au hardi grand tronc, jé l'halîmes auve lé tracteu tchiques pas du fôssé. Not' patron arrivit pouor vaie not' progrès, auve san p'tit tchian qui couothait sans cêsse parmi les touffets d'longue hèrbe. I' trébutchait souvent, rouôlait et pis tâchait d'sauter par d'ssus. Étout, preunmiéthement, i'n'aimait pas l'brit du tracteu ni d'la scie, mais i' s'accalmit d'vant longtemps.
 
Enfîn, j'finnîmes et j'rentrînmes à la maîson pouor eune grand' bollée d'soupe dé lédgeunmes prépathée par ma belle-soeu et ma belle-méthe.
 
Quant à mé, tchi bouôn jour dans la campangne et tchi bouonne êtchipe pouor la préchaine tâche!
 
Ralph Nichols
 

Viyiz étout:

 

Les Pages Jèrriaises