Chutte affaithe ichin s'passi, il y a tchicques s'maines, et est la pure, pleine et entièthe vérithèt, fouai de Marie Hibou.
Ch'tait un Samedi la nièt. L'amin Tom, qu'est couonnu dans touot Jerri, v'nait d's'mettre au lièt quand n'v'la, vers minièth, la cliochette du phone qui couomenchi son tintamare. Tch'est que chunna voulait dithe et n'v'la l'amin Tom à l'écouote. De l'autre but du fil une p'tite vouaix s'faisait, en englais: Voulous v'nir bé vite, ch'est à l'entouor du chéva de sièz nous.
L'amin Tom, n'viyant autchun plaisi à aller couorre à l'autre but de Jerri à dithèt heuthe du nièt, fit de san mus pouor qu'nos gens attendent jusqu'au levé du solé, mais nous ly réponnit qu'il fallait v'nir à son, pus vite, car n'v'la qui pressait.
Donc, à grand r'gret mais pouor faithe son devoir, notre Tom monty dans son motor et cache, l'v'la hors du bord iou il y a un pont aux roses sans roses. Il entri touot drait dans le bel d'la ferme à Joe – j'crains que ch'est d'même qu'nous appelle chu fermi.
Y fut reçu par l'fermi, sa Missis et lus mousse et quand y d'mandi iou qu'était l'ch'va, n'v'la nos gens qui allumites chacun une chandelle couomme pour une procession et chunna à la grande surprinse de Moussieu Tom, qui n'y comprenait mot. Y faut dithe qui n'souffliait pon d'vent, mais touot d'même nos gens avaient une job à garder lus chandelles allumées.
Donc, les v'la touos qui s'en vont, notre amin Tom avec sa torche électrique et ils s'en futes à travers l'pré couomme autant de "bélangis" et assez pouor effriter touot l'vaisiné si ch'est qu'nous les avait vus.
Quand vint un temps, Moussieu Tom voulut saver si ch'est que chutte procession s'n'aller durer d's'heuthes et Joe ly réponni que nennin, vu que ch'tait touot près et y l'y montri un creux t'chi fut un vivi pendant un temps mais achteu est rempli d'pité et d'un tas de ramasseries.
Et dans chu vièr vivi, Moussieu Tom aperchut la tête d'un c'va et un mio des pattes de devant, car l'pouorre anima était autrement enterré dans l'pité. Une buanne chose pouor notre fermi qui faisait nièr, car s'il avait veu la longue fache que fit notre Tom quant y réalisi pourtchi qu'on l'avait fait v'nir j'crais quassiment que notre fermi Joe en aurait eu peur.
Mais notre amin Tom pensit qu'oprès touot y fallait pas s'mâri mais faithe de san mus pouor haller le ch'va hors du vivi et y'd'mandi à Joe d'aller chercher des traits ou un palan.
Notre Joe s'n'alli bé vite à la ferme et r'vint avec deux ou trais traits en tchuir, un marté et des clious. Couomme notre Moussiu Tom d'mandait pourtchi l'marté et les clious, l'fermi Joe l'y réponnit que ch'tait pouor cliouté ensemble les traits s'ils taient un miot courts!
Ayant désembourbeler le ch'va et l'ayant r'hallé de dedans l'creux, notre vet, viyant que la pouore bête n'tenait pon d'but, dit au fermi Joe d'la laissi dans l'pré et de bein la couvrir viyant que ch'tait d'la caleur qu'il l'y fallait pouor la r'mettre debut.
Moussieu Tom s'en r'touoni siez ly s'couochi.
D'ver midi, y ralli vais le ch'va et douonni l'ordre qui fallait continuer à l'garder caud autant que possible et que touot irait bein.
Faut craithe que Joe pensit autrement, car l'arlevée y s'décidi d'aller siez un vaisin pouor qu'il lui douonne un coup d'main et avec l'tracteur le ch'va fut ramené dans son étable.
Le Lundi, quand l'amin Tom s'présenti pouor saver t'ch'est qu'en était, notre fermi l'y dit que l'pouorre ch'va s'était nié dans le canné!!
Notre vet voulut en saver un p'tit pus long et ch'est alors que l'fermi Joe l'y raconti couomment qu'avec son vaisin et un tracteur le ch'va avait été ramené dans son étable et mins aussi confortable que possible. Au matin, Joe vit que la porte de l'étable avait été défoncée et l'ch'va n'tait pus là et opprès un p'tit temps il le trouvit nié dans l'canné.
Joe était d'avis que l'ch'va s'tait levé dans la niet et qu'ayant sé il avait défoncé la porte de l'étable pouor aller bèthe au canné couomme de coutume, mais qu'étant failli il avait tchès la tête la prumièthe dans l'ieaue du canné et s'était ainsi nièt.
Et n'v'la la triste histouaithe de chutte pouorre bête.
N'en v'chein eune autre. Chutte fais ch'est à l'entouor d'un grand boeu. Chunna d'passi sièz Raymond, du bord du Douet. Chu boeu s'était écappé et couomme il 'tait furieux nous pensi que l'mus était d'faithe v'nir l'vétérinaithe pour l'abattre. N'v'la qu'était bein facile à couommander, mais ch'est que l'boeu n'l'entendait pon de même et pas moyen d'en approchi.
Vint à passer dans la route un vaisin avec une chèrge de navets dans un harnais. Notre vet pensi, n'v'la ma chance. y d'mandi au vaisin d'arrêter son ch'va, se jutchi sus la chèrge de navets et donnit l'ordre de batchi l'touot dans l'gardin.
Notre boeu s'approchi pouor happer des navets, et boum! avec son pistolet notre vet de son jutcheux abattit l'boeu.
Caouain 24/10/1936
Viyiz étout: