L'Sieur Caouain peut dithe chein qui veurt mais ch'n'est pon mé qui m'trompe sus ses sentiments, pas achteu, car s'il fut un temps ou dans ma jeune innocence, couomme dit la chanson, j'criyais à toutes ses sornettes qui m'faisaient grand pliaisi, d'pis d's'années j'sais que trop bein qu'il n'y a pon qu'à l'homme que la pathole a été douonnée pouor déguiser sa pensée, d'pis que ch'est d'même avec chut oisé d'malheur!
Et tchi créatuthe ordilleuse qui voudrait faithe accraithe ès siens d'la gazette, qu'il devait y avèr parmi ses anchètres un sculpteur qui ly a transmins san penchant d'artiste avau les générations!
J'gage mé qu'en r'montant touote la généalogie de la famille Caouain même jusqu'au sien qui fut sauvé des ieaux dans l'arche de Noé, j'gage que vous n'trouverez pon pus laid plumage et pus hypocrite verbiage!
Nennin, j'n'en sis pon jalouse une mie, car tchi qui voudrait d'un dithèt vilain oisé, mais si tchique fais j'avons du brit ch'est viyant qu'oprès touot ses menteries affrontées m'font enragi quand j'm'd'mande pouortchi qui m'prend pouor oser m'raconter dithèt menteries!
Mais oprès touot, tch'est que chunna peut vous faithe si j'ai les gambes enfliubées dans des cauches de laine. Ch'est y des d'vis à mettre sus une gazette!
Chutte affaithe ichin, qu'est la pure, plieine et entièthe vérithèt, est chent fait pire que la sienne des pihanes.
Il y a de chunna pas des mais, ni des s'maines, mais tchicques jours. Un homme qu'est un miot pêtcheur de sa sorte s'rendit dans ieune des baies de l'Ile, que ce soit dans la baie de St. Aubin ou une autre n'v'la qui n'y fait rein.
Chutte homme là que p't'être vous connaissez ou que p't'être vous n'connaissez pon, je l'appelerons Cléry, si vous voulez.
Donc Cléry tait à la pêque au mullet et d'pis d's'heuthes attendait toujours d'en happer iun ou deux mais l'mullet était aussi tétouonne qu'une mule à quatre pattes et il n'y avait rein à faithe. Ch'est d'antchi que Cléry, fort mârri, pouor seur, patchi ses lignes et décidi d'rentrer sièz ly.
Y bougonnait à son touot seu quand sus l'sablion y rencontri un autre pêtcheur qu'il connaissait d'veue et s'apprêchi de san bord pouor ly d'viser.
Bé seur, oprès aver paslé du biau temps qui faisait, nos deux pêtcheurs parlites de pêque et notre Cléry en viyant que l'autre avait deux ou trais biaux mullets dans son pagas s'fit qu'il tait fort ennièth, car il tait v'nu à la pêque viyant que sa Missis était malade au liét et qu'oulle ly avait dit qu'un miot d'paisson frais ly f'rait grand pliaisi. Et notre Cléry s'lamenti tant et si bein sus sa pouorre Missis et sus l'malheur qu'il n'avait rein pêtchi que l'autre s'fit: D'pis que ch'est d'même, tiens emporte à ta Missis chu mullet ichin. Et il y donni l'pus bé.
Notre Cléry, bein content, chaqui de main avec l'buan Samaritain et ly promins qu'il pouvait compter sus ly si jamais il pouvait ly être utile ou ly bailler un coup d'main.
L'malheur voulit que notre buan Samaritain quant y vouli monter sus sa bike pouor rentrer siez ly l'tyre de drièthe était couomme disent les anglais “flat”. Y prins sa pompe, mais l'vent n'restait pon et ch'tait tchique puncture.
Couomme il n'avait pon chein qui fallait pouor patchi l'inner tube et qui d'vait passer d'vant la maison à Cléry pouor s'en aller siez ly, y pensi d'pis que ch'est d'même j'appellerai siez ly.
Et notre buan Samaritain poussant sa bike s'rendit touot drait siez Cléry.
A sa grande surprinse ch'est la Missis qui ly réponnit. Et ly qui criyait qu'oulle était bein malade au lièt, couomme ly avait dit Cléry.
Mais v'la qui n'est pon l'pus bé de l'affaithe, car notre homme s'doutit qu'il avait été joué par les menteries de Cléry d'pis que la Missis paraissait d'charme et que v'la qui aurait été un affront d'ly demander si oulle tait mus.
Donc, notre homme pensi qu'il tait mus de n'rein dithe sus chein qui v'nait de s'passer sus l'sablion, mais d'explitchi qu'ayant une puncture à sa bike il avait pensé que p't'être bain que s'n'homme aurait pu ly aidji à la réparer d'pis qu'i s'y connaissait et d'avait aver tout chein qui fallait.
Notre Missis ly réponnit qu'oulle avait grand r'gret, mais que s'n'homme avait été à la pêque dans la matinée et avait rapporté un si biau mullet qu'il tait hors pouor l'offrir en vente sièz ieun des grands Moussieux d'la paraisse!
Chein qu'en pensi notre buan Samaritain, je n'sais pon et même j'n'voudrais pon l'dithe sus la gazette, mais chutte affaithe là est la pure, pleine et entièthe vérithèt, fouai de Marie Hibou qui pouorrait vos dithe ettouot l'nom de chu peule, mais qui aime mus taithe sa becque.
- Jack Snitchou. - J'sais bein qu'un nièrr cat veu la séthée d'la fête de St. Aubin a r'garder les fireworks du haut du mont Cochon mais ch'n'tait pon l'sien r'cherchi par la police et qui, viyant la situation est hors à la Nouvelle Zélande, à chein que j'ai oui.
Marie Hibou
1929
Viyiz étout:
