I' n'se passe pas quâsi de s'maine acheteu que nou n'liaise sus les gâzettes tchique protèt contre la manièthe que nos jeunes visiteurs Angliaises lus habillent.
I'y a des gens qui sont d'opinion qu'i' n'est pas décent de s'promener dans les rues sans des manches à couvri lus bras ou sans cauches à lus gambes.
Mais chenna ne dait pas concerner personne.
Avec la grande chaleur qu'i' fait tout chu temps i' daivent être bain pus confortablyes que s'illes 'taient encaffotées dans trop d'habits.
Et pis i' y a ettou les exigences de Madame la Mode. Pour le moment ch'est la mode de porter aussi p'tit d'habits que possiblye et d'exposer à la veue des siens qu'apprecient les biautés de la forme humaine, des membres si bain moûlés par la Natuthe.
Et y a oquo une autre considéthation.
Le pus grande partie de nos jeunes touristes sont des filles qui sont enfrumées pour onze mais sus les douze dans des bureaux, des boutiques ou des banques a respither un air contaminé par le gâz et la fumée, dans des villes et des contrées ouest que l'solé n'se montre qu'à de bain rares intervalles.
I'y a-t-i' don à s'êtonner si ch'est que duthant les heutheux tchinze jours de “holiday” qu'illes ont par an, i's laissent aller un mio à l'abandon et qu'illes en prennent, comme nou dit “tout attouo d'lus lian?”
Peut n'on lus r'prochi avec autchune raison l'ordgi pardonnablye qu'illes ont de rentrer siez ieux avec les membres brunis par le solé d'Jêrri, de tchi que je nos vantons si bain?
Nos lecteurs aithont 'té sans doute bain amusés de vaie que jusqu'à not'e Chef à fait la mîne d'être scandalisé par tchiqu'unes des choses qu'il a veu, et ses permins une feis ou deux, d'en faithe la critique dans sa gâzette.
Sinon que je n'veur pas oquo l'offenser trop je li dithais qu'i' n'est qu'un boustre d'hypocrite.
S'il est aussi sensiblye comme tout chenna i' n'a pas besoin d'les r'garder!
Mais ch'est pus fort que li! I' n'manque pas une seule occasion de s'régaler la veue, allez!
Je l'connais bain, mé!
Ch'est bain pour chenna que v'là qui m'fait chose de l'vaie moraliser sus chute tchestion-là, justement pour se faithe applaudi par une certaine section du public.
Quant à Marie Hibou, i' n'se passe pas d'jour qu'ou n'rentre opprès ses promenades dans la ville, scandalîsée par les mithaclyes qu'oulle a veu.
Ou s'entretchaint avec le Chef sus l'manque de modestie de ches Anglaises-là qui dev'thaient rouogi d'honte; tchi sorte d'mèthes qu'illes ont pour permettre ditèt? et ainsi d'suite.
Et pis on fait une harangue sus l'apathie d'la police et des autorités civiles, dépis l'Bailli jusqu'au huissier d'la P'tite Cour et finit géneralement par dithe qu'ou n'sait pas tch'est qu'j'allons dev'nin!
Mais je sais bain tch'est que la tchaint, lyi.
Ch'est la jalousie!
Jusqu'achteu oulle a tréjous suivi les modes quand oulle a peu. Ou vos souvenez bain du train que j'fis quand ou se sâbri les cheveux.
Si ch'est qu'ou n'suit pas l'exemplye des autres ch'est parce qu'ou n'ôse pas.
Malgré lyi, oulle est obligie de garder ses gambes enfliubées dans des cauches assez êpaisses car, pour des raisons que je n'ai pas besoin de dêtailli ichin, i' n'sont pas montrablyes.
Et ch'est justement ch'la qui la fait enragi.
Toutes les feis que chu sujet-là vaint sus l'tapis, je souôtchains tréjous la partie de nos jolies visiteuses et je finissons tréjous par aver du brit. Ou m'dit que j'dev'thais aver honte, à l'âge de patheils spectaclyes et ou crait tout bouannement que ch'est parce que j'ai un gout tout-à-fait dêpravé; mais la pouôre fille se trompe absolûment, ou n'connaît pas mes sentîments.
Je vos asseûthe que si tchiquefeis je m'permets d'admither les formes ravissantes de nos jolies d'mouaîselles, ch'est d'un point d'veue puthement et simplyement artistique.
Je crai réelement qu'i' dait y aver ieu parmi mes anchêtres un scuplteur tchelconque et qu'san penchant d'artiste m'a 'té transmins avau les généthations.
Caouain
1929
Viyiz étout: