Jusqu'acheteu, j'avais tréjous ieu le pus grand respé pour Messieux les membres des Etats, mais dame, par exemplye, ch'est fini.

Pensez-don, mé qui m'attendais qu'i' s'en allaient être tous unanimes à passer la louai sus l'Early Closing de toutes les boutiques etc. et pis crac! tout tchulbuté du prumi coup, Jeudi matin.

Je m'en douti quâsi quand j'vis l'Chef sorti d'la séance et s'en v'nin à la boutique a travers le Square.

Il 'tait douze heuthes et d'mie à peu près et j'étais jutchi sus l'conteux à pâler à Frainque Amin. J'adonni à r'garder par la f'nêtre et j'dis a Frainque, "La Chambre est l'vée! N'chin l'boss qui r'veint avec son rapport. Je n'sais tch'est qu'en a 'té!''

Quand il entri, je vis tout de suite par la riton diabolique que j'li connais si bain, que la cause était perdue, et je m'décidi de n'li faithe autchune tchestion au sujet.

Mais dès qu'i m'vit i' s'fit comme chenna, "Ah, Caouain, pas d'Early Closin' pour té man vi, tu restethas en travas comme d'habitude, aussi longtemps comme la boutique es'sa ouverte.''

J'etais si mârri que j'failli li pitchi un almonas à la tète.

Tout d'abord je pensi que ch'tait oquo d'ses blagues mais quand i' m'certifyi que l'projet avait 'té renversé par vingt-huit contre vingt-deux, et m'montri san résumé d'la vot'tie, je vis bain que, malheutheusement, ch'en était fini de toutes nos belles espethances.

J'avais dêjà rêvé de ches belles promenades que je f'thais sus la cauchie les sethées d'êté avec Marie Hibou, ou tchique autre. J'avais attendu avec impatience les heutheux Samedis que la boutique frumethai a sept heuthes, me donnant l'opportunité d'aller vaie les "Pictures'' a Moussieu Boiëlle, à la pliaiche de rester ichin à vendre des gâzettes par sus l'conteux jusq'a djaix heuthes du sé, comme je fais toutes les s'maines pour faithe pliaisi à des clients sans raison qui laissent tréjous lus gazette pour la dernié chose.

Eh bain, ches belles aspithathions-la sont toutes trébutchies, et j'dis qu'ch'est d'tchi honteux, mé!