Les Pages Jèrriaises

Bram et Jan

 

St.-Hélier, le 19 Déc. 1890

Mousieu l'Éditeu. - Ou savaiz bain qu'l'aout jeu j'akati scïez vous des histoithes êcrites par l'ex Chentnii Bram Bilo et un aoutre racontée par Jan d'la Maze, et ou me demandites de vos rapporter tchez j'en criyais; Eh bain! Moussieu, je crai quant à mé que cheu que Mait Bram a êcri là n'est q'du niolin et qu'il éthait biaucoup mûs fait de se taithe; janmais il ne rêgalera son Master Piece - l'Exposition. Quant ès avantuzes a Jan de La Maze et Janneton La Miêtchi, racontées par li-maîme, j'len félicit; quand j'en lus des parties à ma bouanne femme ou'm dit: Stop Jô! Stop Jô! I'm sea sick! Rain que d'm'entendre liethe en bon vier jargon le viage en mé des De La Maze et des Fiche. Faut'il que che sait diantrement bain écrit, aiche pon Mousieu l'Éditeu! Mait Jan j't'en fais mon complliman, et la préchaine bordaie que tu rveindras dans la caôuchie avec la "Belle Janneton," veins sans cérémonie prendre une bouanne tasse dé thé avec y'un de tes admirateurs -

 

Le Mousse

Nouvelle Chronique de Jersey 20/12/1890

 

 

Viyiz étout:

 

Les Pages Jèrriaises