Les Pages Jèrriaises

Betzy la Belle a don pâlait

 

L'églyise pârouaîssiale dé St. Pièrre

L'églyise pârouaîssiale dé St. Pièrre

Avous ouï la grande nouvelle?
Savous bain que l'autre Mardi,
Dans Saint-Pierre nou sentendi
Sonné "Elisabeth-la-Belle,"
Et que dans toutes les maisons
Nou zen admizait les biaux sons.

Jamais dans aucune paraisse,
Depis que Jèrri est Jèrri,
Nou na veu le peuple aussi fi.
Chacun disait: Je siès bain aise,
Et s'abordant nou se disait:
Betzy la belle a don pâlait.

Et du Fossi jusqu'au Ministre,
Y gniavait pas un Saint-Pierrais,
Depis Biaumont jusqu'ès Augerez.
Fut-ti de l'humeur la pue tristre;
Qui ne se mins pas a dansé,
Ou tout au mains a gigoté.

La fête était patriotique,
Mais nou resti homme de bain,
Nou ma dit qu'un vier Wesleyen
Embrachi une catholique!
Et l'ivrogne et le tiitôtleur,
Donnaient le bras au goude-templeur.

Nou la sonni pendant sept heuze,
De septante-deux a septante-trais,
Et nou vis pue d'un Saint-Pierrais,
Quand nou ne l'entend pue, qui plieuze,
Mais y finirent par poussé
Trais houras pour lue Député!!!

Mais coïncidence bizarre,
Car sans compté ni yun ni deux,
Le coq chanti Cocolincheux,
Pie fut se r'juqui sus sa barre,
Et le laissant dans san chandri
Les sonneurs furent se couochi.

 

L'Anmin Flip
1873

 

Viyiz étout:

 

Les Pages Jèrriaises