J'aime à marchi dans les vallées,
Dans les gardins, dans les côtis,
Ouestque les boués font des allées
Et l'herbe donne un vert tapis,
Ouestque nous ouait la douoche allouette
Et le mergot nous veit souorir,
Ouestque nous-s-entend la cauvette
Et l'potiron nou veit flieurir.

Que la nature est grande et belle,
Que de biautés à l'entou d'nous!
L'pauvre et le riche ont leux parcelle
De chein que Gieu donne pour tous.
Si tout est si bé dans la vie
Et sus nos têtes et souos nos pids,
Si notre terre est si flieurie,
Que sera donc le Paradis?

A.A.L.G.
 

vèrsion modèrnîsée:

J'aime à m'assiéthe au bord d'la grève,
Jétant mes r'gards parsus la mé,
Entendre un chant tchi l'âme enlève,
Lé son des fliots quand veint lé sé.
J'aime à entendre l'cri dé la mauve,
Et vaie au pliein sauter l'sandron
Tchi dans ses creux sé cache et s'sauve,
Quand tout est calme à l'envithon.

J'aime à marchi dans les vallées,
Dans les gardîns, dans les côtis,
Où'est qu'les bouais font des allées
Et l'hèrbe donne un vèrt tapis,
Où'est qu'nou ouait la douoche alouette
Et lé mèrgot nos vait souôri,
Où'est qu'nous-s-entend la caûvette
Et l'potithon nou vait flieuthi.

Qué la natuthe est grande et belle,
Qué dé bieautés à l'entou d'nous!
L'pauvre et lé riche ont lus parcelle
Dé chein que Dgieu donne pour tous.
Si tout est si bé dans la vie
Et sus nos têtes et souos nos pids,
Si notre tèrre est si flieuthie,
Qué s'sa donc lé Paradis?