Les Pages Jèrriaises

L'Assembliée d'Jèrriais

Un viage en Tèrre Sainte

L'Assembliée d'Jèrriais

Un viage en Tèrre Sainte La rêunion mensuelle eut lieu lé 22 d'avri dans la Salle Publyique dé St. Martîn. Ch'était pour entendre un discours par le Sieur Geo. Le Masurier entouor san viage en Terre Sainte l'année passée.

Lé rapport dé la rêunion du mais d'mars fut accepté, et deux nouvieaux membres fûtent êlus.

Annonces


Lé Président annoncit que la rêunion du mais d'mai es'sait siez Mme. Stevens à La Grange à Ste. Mathie, lé 27, à 8 heuthes, quand Mme. Stevens dithait tchiquechose entouor l'histouaithe dé la maison et l's alentours.

Lé service annuel étha lieu dans la Chapelle dé Wesley-Grove, Dimanche, lé 26 d'juin, à 3 heuthes.

L'Assembllaïe d'Guernésiais a învité L'Assembliée d'Jèrriais à passer un jour avec yeux, lé 8 de septembre, et eune aut' annonce es'sa faite pus tard.

Lé Président annomncit étout qué 17 membres s'en allaient ès fêtes à Rouën à l'occasion du neuvième centenaire dé la Conquête, et les détails pour la séthée à St. Marc.

Les portraits


Lé Sieur Le Masurier c'menchi par montrer un portrait dé l'avion qui portit 110 personnes sus la premiéthe partie du v'yiage. Arrivés en Terre Saint i'y avait pas un moment sans întethet. Jérusalem était eune merveilleuse ville, si bein erprésentant du temps dé Christ et dé d'vant. Jérusalem étant divisé en deux parties, les membres du tour fûtent accomodés dans deux difféthentes hôtels, ieune dans Jourdain et l'autre dans Israël. Dé la grande hôtel du Mont d'Olives i'y avait eune magnifique veue d'Jérusalem et d's alentours. I'y avaient des portraits dé la Cathédrale dé St. Georges; lé pits dé Jacob, qu'est 130 pids d'avant; Gethsémané; la tombe dé Marie; d'eune tonnelle bâtie pour fourni d'ieau à Jérusalem i'y a passant 2,600 années; des bouais à Jérusalem, qu'ont 3,000 ans; et de Béthléhem et ses clioches qui sonnent qu'eune fais par an, à Noé. Dans chette partie-là du pays i' craîssent du p'tun, mais l'ieau est si êcarce que ch'est difficile dé d'viner comment qu'autchune chose peut y crâitre. Les bêtes et animaux pathaissent aver rein à mangi, mais sus tchique sens i' mênagent dé vivre sus bein p'tit. I'y avaient deux-trais portraits d'un mosque qu'est tout a fait en mosaïc et qu'est bein ancien. En d'sous du mosque l'y a d's êtablyes pour 10.000 chevaux. Un aut' mithacl'ye dé chu pays est la ville dé Petra; toutes les maisons, muthalles et bâtisses d'autcheune sorte sont tous dêcopés du rotchi, qu'est d'eune belle couleur dé rose ou rouogeâtre. I' faithait eune grand' chaleur, mais nou' pouvait aller à ch'va pour £1 par jour!

La Mé Morte est si salée qu'il est impossibl'ye dé rester sous l'ieau et nou-s-en sort couverts de sé qui sique sus la pé. La mé d'Galilée est remplyie d'sources; i' y'en a des chents. Ichîn le Doyen d'Jèrri condit lé service dé la Communion dé bouan matin déhors.

Eune chose qu'était frappante est l'grand nombre d'aveugl'yes, des jeunes gens et d's êfant; ch'est causé par les môques qui sé fillent bein près des yeux et même dédans. Eune aut' chose étout était qu'les femmes marchaient partout; ch'était l's hommes qui montaient sus l's ânes!

Lé Sieur Le Masurier fit èrvivre hardi des histouaithes dé la Bibl'ye et tchi dévait être eune grande expéthience pour lé tour dé travèrser l'terrain, les églyises et les c'mîns qué notre Seigneur faisait touos les jours dé sa vie sus chutte terre.

Lé Président ermercyit lé Sieur Le Masurier pour chu discours qu'était l'pâssé si lien mais en même temps lé présent si présent. Ch'avait 'té avec grand întéthêt qué tous avaient êcouté.

Lé Président ermercyit lé Connêtablye pour l'usage de la salle, et en rêponnant lé Sieur Billot dit qu'il 'tait tréjous content dé faithe la beinv'nue à L'Assembliée d'Jèrriais.

Des raffraîchiss'ments fûtent servis auprès par les membres du conmité Dramatique, qu'avaient arrangi la séthée.

1966
 

Viyiz étout:

 

 

Les Pages Jèrriaises