La rêunion mensuelle eut lieu vendrédi, l'27 dé juillet, à La Hougue Bie et à bein près chent membres lus y rêunitent, Lé Sieur C. Green donnit eune partied é l'histouaithe dé La Hougue Bie. Y'a lé Musée d'Agritchultuthe et dé l'Otchupâtion, la tombe et la chapelle. Y'a deux chapelles souos un lief, deux bein difféthentes : ieune date du douzième siècl'ye et l'autre dé 1520. La “Crypte” r'présente ieune à Jérusalem.

Y'a trais êtchussons : Paynèl, 1300; Mabon, 1520, et l'Amiral d'Auvergne, 1802. Y'avait ieu supposition qué dans l'temps dé d'Auvergne y'avait eune tonnelle dé La Hougue Bie au Mont Orgueil. Lé Sieur Green explyitchit la vie à Philippe d'Auvergne qu'avait eune connexion auvec lé Châté d'Mont Orgueil. I' joignit la Marinne et fut prisonnyi d'dgèrre à Paris. Lé Duc de Bouillon, d'la Belgique, à sa mort lî laîssit ses tèrres et l'nommit Prince de Bouillon. Mais duthant les longues dgèrres dé 1790 à 1815 entre l'Angliétèrre et Napoléon en France i' 'tait à la tête d'eune êtchipe dé Marinne et, auprès, en 1815-16 lé Traité dé Vienne fut signé et san héthitage dispathut et i' mouothit à Londres un pouôrre houmme. Y'a plusieurs tombes coumme la sienne à La Hougue Bie (huit ou bein neuf), et y'en a six qui sont en bouanne condition.

Auprès san discours lé Sieur Green r'chut d's appliaudiss'ments et les r'mèrciements du Président, l'Député W. J. Tomes.

Les membres fûtent en groupe pour vaie les difféthentes sections qué lé Sieur Green avait explyitchi entouor.