La Rêunion Générale Annuelle eut lieu Vendrédi au sé, lé 24 dé Septembre, 1954, à 8 heures, dans la Salle d'Agritchulture, St Hélyi. I'y avait eune septantaine dé présents.
Lé rapport dé le dernière rêunion mensuelle fut liu et adopté. Un êtat financyi tch'avait 'té examiné et cèrtifié par les deux auditeurs, et tchi montrit eune balanche en faveur dé l'Assembliée, fut présenté par lé Trésoryi Bertram et adopté.
Dévant c'mmenchi l'êlection d'officièrs et d'comités pour l'année 1954-1955 lé Président fit la beinv'nue aux deux Présidents d'Honneur et lus dit comment qué j'tions heurêux dé l's aver touos des deux auve nous. J'l's avions hardi mantchis dernièrement et ch'tait un vrai pliaisi dé les r'vaie.
Né v'chin la liste d'officiers pour l'année tchi veint:-
Présidents d'Honneur. - Lé Juge Francis Vibert Le Feuvre et lé Sénateu Hedley Le Riche Edwards. Président - Moussieu Sydney George Crill. Vice-Présidents. - Lé Sieur Frank Trachy et Charles Billot; Mesdames Kathleen Le Maistre et Florence Perrier. Trésoryi - George Winter Bertram, Gent. Sécrétaire, - Mlle. Lucille Picot. Auditeurs, - Le Sieur Philip Le Ruez et Mme Emily du Val. Comité Exétchutif, - Mesdames Marie Trachy, Amelia Perchard, Florence Hacquoil et Mme. Députée Green. Mêssieux Winter du Tot, Frank Le Maistre, John Richard et Ernest Vibert.
Nouvieaux membres.
Les chinq nouvieaux membres êlus sont :- Mlle. Anne Malet, Mlle. Marcelle Lé Marquand, Moussieu et Madame William Durell, et Mme. Melina A'Court.
Comme littérature, les membres ont décidé de s'abonner à chinq publyications historiques ou folkloriques. Ils ont chouaisi :- Les Annales de Normandie. Le Viking. Les Etudes Normandes. Les cahiers Léopold Delisle et Les Normands de Paris.
J'espérons que les membres s'en vont en profiter et tchi trouveront l'temps d'les lière ch't hiver.
Lé Sieur Ph. Ahier, B.èsS., nos donnit eune liste dé viers noms Jèrriais dé rues, dé carrefours, et autres. I' nos explyichit l'origine dé ches noms-là, auve la facilité d'iun qui s'y r'connaît. Son discours fut bein apprécié.
Ensuite i'y eut un dialogue entre Mme A. Perchard et lé Sieur Richard - eune pièche risiblye, en bouon St Martinnais. Pour suivre, lé Sieur Chs. Billot nos racontit des anecdotes véridiques, et amusantes. Il en a toute eune collection, et eune bouanne mémouaire étout.
Lé Président ermèrcyit le Sieur Ahier et l's autres membres pour nos aver divertis, et l's appliaudissements tchi suivîtent futent la preuve dé la r'connaissance dé tout l'monde.
La préchaine rêunion èra lieu lé 21 d'Octobre, dans la Salle Parouaissiale dé la Trin'té, et s'ra suivie d'eune sérée sociale, auve jeux dé cartes.
Viyiz étout: