I.

Tu étais gros, tu étais gras
Tu aimais la bouonn' compagnie,
Tu marchais drait, d'un hardi pas -
Et avais l'air de joui d'la vie.
Ach't'eu nou n'te reconnait pon
Coumme-est qu'chla s'fait man pouôr' garçon!

2.

Ta casaque, te pend sus l'dos,
Coumme si ou n"tait pas fait' pour tai
Tu n'as de vrai, qu'la pé' et l's os!
A vaie tan teint, je dithais, mai,
Tes r'pas ov'tai n's'accordent pon,n-
Coumme-est qu'chla s'fait man pouôr' garçon!

3.

Nou t'vait parfais qui dans les ruettes,
A tan tout seu' vas te traînant
Les mains coulées dans tes pouchettes,
La tête baissie, et marmottant
Coumm' si tu perdais la raison -
Coumme-est qu'chla s'fait man pouôr' garçon!

4.

Et qu'as-tu donc? est-ch maladie?
Ou quiqu' chagrin, ou quiqu' malheur,
Ou quiqu' hardell' jeune et jolie,
T'a-t-all' par chanc' piqui au coeu'?
Je parie que ch' est chla tout de bon,
Qui t'fait maigri' man pouôr' garçon!

5.

Eh ben!, crai-mai, si ch'est ainshin!
Ne reste pon èpirotai, -
Mais mets-tai brav'ment souos tan fin.
Et va lui dith' chain qu'oulle a fait,
Vas-y tai-même et n'écris pon, -
Ch'est là m'n avis man pouôr' garçon!

6.

Qui sait? ou pouorra t'faith' la fête,
Et prendr' pityi de tan cas -
Mais quand ou chaqu'thait de la tête
Plieuth' si tu veurt ou ne plieuth' pas
Mais soign' tréjous d'n'en mouori pon, -
Chla s'sait d'un niais man pouôr garçon!