Né v'chîn l'amour: qué j'allons s'lon ses c'mandements. Chennechîn est lé c'mandement exactément d'même qu'ou l'avez ouï d'pis lé c'menchement: allez d'même.
Y'a eune racachie d'embliûtreurs tch'ont galvaûdé partout l'monde, des cheins tchi n'admettent pon qu'Jésû Chri est v'nu dans la chai; autchun d'ches'-là est l'embliûtreux et l'antchichrist! Mêfi'-ous, à seule fîn qu'ou n'pèrdêtes pon chein qu'nou-s'a travailli pouor, mais r'chévthètes la plieine rêcompense. Châtchun tchi n'reste pon dans l'enseignement du Christ mais tchi va ho'-l'bord, n'a pon l'Bouôn Dgieu; l'chein tchi reste dans l'enseignement a l'Péthe et l'Fis ensembl'ye. N'atchilyiz pon siez vous ni faites la beinv'nue à autchun tchi veint à vous sans apporter ch't enseignement-chîn; ché s'sait faithe la beinv'nue à la maûvaîtchi d'un malîn.
J'ai tout pliein à t'êcrithe, mais jé n'sis pouor l'mettre bas en encre sus du papi, mais j'espéthe v'nîn t'pâler fache à fache à seule fîn d'nos rêjoui.
Viyiz étout: