 |
 |
 |
Lé Nord dé Dgèrnésy est un mio coumme Grouville et St. Cliément en Jèrri à m’n avis. La tèrre est pliate et y’a des p’tites maîsons et des caûminnes lé long d’la côte. Ch’est ichîn qu’nou trouve les pus întérêssants des dolmens en Dgèrnésy.
Le Déhus
Au Nord-Êt, nou tchitte la grande route et par eune ruette y’a un p’tit mondrîn couvèrt d’bliête auve eune bâsse muthâle et eune hêmie. Ch’est la pouquelaye du Déhus. Ou fut saûvée y’a deux chents ans quand un moussieu l’acatit pa’ce qué d’s ouvrièrs avaient l’întention d’faithe sèrvi les vielles pièrres coumme matéthiaux d’bâtithie.
Achteu y’a eune porte qu’nou-s’ouvre et en baîssant la tête nou-s’entre dans la pouquelaye. Y’a un bouton à côté d’la porte en entrant pouor alleunmer les veues. Au mitan du but d’la chambre d’la pouquelaye y’a eune longue pièrre - mais l’pus întérêssant dans l’dolmen est sus ieune des pièrres du pliafond - y’a l’înmage d’eune fache stchulptée sus la pièrre. Nou crait qué ch’tait eune pièrre tchi ‘tait dréchie tchique bord mais a ‘té r’faite sèrvi pouor la bâtithie du dolmen. Ch’est l’portrait d’un arbalêtchi - eune fache auve d’s èrchelles tch’est mênommée “lé gardgien d’la tombe”.
Le Gardien du Tombeau, Le Déhus
Y’a un bouton spécial pouor alleunmer eune veue pouor vaie la fache pus cliaithement.
Ch’est tchuthieux d’penser qu’i’y’eut tchitchun tchi fît chu portrait y’a tchiques milles ans quand nou-s’est à san tout seu dans chutte chambre souostèrraine.
En tchittant Le Déhus et en allant vèrs Nord-Vouêt, nou pâsse lé tèrrain d’golf dé L’Ancresse. Chenna ramémouaithe les mielles dé Grouville.
Y’a un mont pas liain d’la grève - nou vait les tours par la côte - où’est qu’nou-s’a dréchi à ches drein euen pièrre du millénaithe (d’même qué j’avons siez nous en Jèrri mais bein pus haute).
La Varde
Souos l’geon, y’a eune ouvèrtuthe - ch’est l’dolmen d’la Varde. Ch’fut iun des touos preunmièrs dolmens à êt’ dêfoui en Dgèrnésy - et ch’est l’pus grand, j’crai. Lé janne FC Lukis vit chu travas-là et né v’là chein tchi l’înspithait à êtudgier l’s antiquités - et ch’fut li iun des fondateurs du mûsée d’Dgèrnésy.
La côte pa ichîn est bein saûvage, êtant au Nord-Vouêt d’l’Île et nou peut aîsiment înmaginner les gens d’chu temps-là dans la préhistouaithe à faithe lus offices et cérémonies ichîn sus chutte côte.
Chu site-chîn n’a pon la même trantchillité qu’Lé Déhus mais l’atmophéthe est p’t-êt’ pus authentique ichîn qu’là-bas. Si nou d’cend par les “creux” du tèrrain d’golf en trouvant san c’mîn par les coussîns dé geon, nou peut trouver acouo un site préhistorique dé grand întéthêt - ch’est Les Fouaillages. Chu site fut dêcouvèrt assez dreinement - ch’fut en 1976 qu’nou trouvit les pièrres et nou fît eune grande excavâtion du site.
Les Fouaillages
Pouor dé mé, j’n’ai janmais veu un ‘té site (tch’est bein complyitchi). Ch’est coumme eune tête d’èrchelle ou trian dé pièrre auve deux chambres spéciales dédans. I’ sembl’ye qu’i’ y’avait des creux d’badgettes et qu’i’ d’vait y’êt tchique structuthe ou structuthes en bouais - p’t-êt’ qué ch’tait pouor un pliateforme pouor laîssi les corps ès êléments avant d’mett’ l’s os dans l’dolmen même.
Nou dit qu’ch’est ieune des pus anciennes structuthes en Ûrope. Pouor dé mé, j’dithais qué, même au mitan des creux d’golf et des joueurs bein aimabl’yes tchi dîsent “bouônjour” en pâssant et tch’ont des commentaithes entouor lé temps même ès vîsiteurs non-joueurs, chu site est iun des pus mystéthieurs en Dgèrnésy. J’n’avons rein d’même en Jèrri, en tout cas.
Y’a acouo des dolmens par la côte du Vouêst.
Le Trepied
Lé Trépied est sus la côte et ch’est coumme not’ Rocque Bèr - la pliaiche des sabbats des chorchièrs aut’fais. Coumme pouquelaye, il est pus p’tit qu’la pouquelaye d’Faldou - ch’est un mio pus coumme lé Couperon en Jèrri. Il est bein difficile à apprêcier chu site-chîn viyant l’manque d’run à l’entou. Nou n’peut pon prendre d’l’êcart pouor vaie les pièrres - y’a juste assez d’run pouor pâsser à l’entou mais nou n’peut pon înmaginner les chorchièrs et les chorchiéthes - ou même lé dgiâbl’ye li-même - à danser et à faithe lus sabbats ichîn dans ches conditions - mais i’faut admettre qué nou-s’a d’la diffitchulté à înmaginner les gens du Vendrédi à Rocque Bèr achteu!
Le Creux ès Faies
Nou pâsse un mio pus liain par la côte et nou-s’arrive à Lihou. Par la ruette tchi mène au pont vèrs Lihou, y’a un mondrîn entouothé d’bouais: ch’est Le Creux ès Faies - L’Creux ès Faîtchieaux. Nou soulait craithe qué ch’tait l’entrée au rouoyaume des p’tits faîtchieaux.
La Gran'mère du Chimquière
Chein qu’Dgèrnésy a qué j’n’avons pon, ch’est des longues pièrres stchulptées. À l’entrée du chînm’tchiéthe d’l’églyise dé St. Martîn, nou trouve la Grand’mère du Chimquière (Grand’méthe du Chînm’tchiéthe) - eune vielle longue pièrre tch’avait ‘té trouvée et pliaîchie ichîn. Oulle avait ‘té bûchie au dgiêx-neuvième siècl’ye - mais oulle avait ‘té bein vite èrgrée. I’ sembl’ye qu’un minnistre dé l’églyise n’voulait pon qu’san troupé louangîssent les stchulptuthes - mais i ‘taient si mârris ches’-chîn quand i’ la bûchit qu’nou fut oblyigi d’l’èrpather.
Quand j’vîsitis St. Martîn au mais d’Mai 2001, y’avait des flieurs sus la tête d’la Grand’méthe qu’nou-s’avait laîssi là coumme présent - j’pouôrrais même dithe, coumme sacrifice. Chenna nos mouontre qu’les vielles couôteunmes sont acouo vivantes!
La Grand’méthe est coumme eune gardgienne d’l’églyise mais oulle a changi un mio avaû les siècl’yes. Au c’menchement ou ‘tait pus sîmpl’ye mais ses g’veux et san manté avaient ‘té ajouôtés pus tard.
La Gran'mère du Chimquière
Nou peut vaie qu’les dolmens dé Dgèrnésy sont hardi întérêssants et méthitent bein eune vîsite et nou pouôrrait les compather auve les cheins d’Jèrri. Les Dgèrnésiais ont des dolmens tchi sont couvèrts dé bliête - même èrcouvèrts coumme Le Déhus - mais i’ n’ont pon un hardi grand monûment coumme La Hougue Bie.
Nou peut dithe qu’nou peut entrer dans les pouquelayes du Déhus, du Creux ès Faies et d’La Varde. En Jèrri ch’n’est qu’dans La Hougue Bie qu’nou peut s’senti coumme dans un appartément ou tchiquechose coumme eune églyise - mais p’t-êt’ qu’les Pouquelaye dé Faldou et des Monts Grantez ont pus d’atmosphéthe qu’les dolmens dé Dgèrnésy.
Y’a des tchestchions: pouortchi qu’j’avons des difféthents monûments? Nou-s’éthait creu qu’j’eûmes les mêmes pouquelayes à chu temps-là, mais des difféthents exempl’yes avaient survêtchus jusqu’au jour d’aniet dans les difféthentes îles. Au mains, il’ ont, les Dgèrnésiais, des pièrres stchulptées qu’j’n’avons pon: la Grand’mère du Chimquière dé St. Martîn, la pièrre d’St. Saûveux et l’Gardgien d’la Tombe du Déhus. Ch’est-i’ pôssibl’ye qu’j’avêmes étout en Jèrri ches sortes dé stchulptuthes tch’ont ‘té pèrdues achteu?
Viyiz étout: