L'Églyise dé St. Matchi au Dou dé D'mi à St. Louothains est mus connu par san mênom Angliais dé “Glass Church” - oulle est bein fanmeuse pouor tout l'vèrre tch'a 'té fait sèrvi dans la dêcorâtion.

L'Églyise fut bâtie en 1840 coumme eune chapelle d'aise pouor les cheins d''la contrée à seule fîn qu'i' n'fûssent pon oblyigis d'aller amont l'Mont Félard pouor aller ès sèrvices dans l'Églyise Pârouaîssiale.

Dans l's années 30, Lady Trent, dêdgèrpie du preunmié Lord Trent dé Nottingham, fondateu dé Boots l'apotitchi, dêcidit d'èrdêcorer l'églyise - tchi s'trouvait pas bein liain d'sa maîson - en mémouaithe dé s'n houmme. Lady Trent 'tait eune Jèrriaise tchi s'mathyit auve Jesse Boot (tchi d'vînt lord pus tard).

Oulle empliyit l'maît'-vèrryi Français René Lalique et l'architecte Jèrriais A.B. Grayson tch'înstâllîtent les nouvelles dêcorâtions dans l'églyise en 1934.

À r'mèrtchi:

• L's anges sus l'us.

• La grand' crouaix en vèrre drièthe l'autel est illeunminnée par des lampions en bâton.

• Dans la chapelle, la belle stchulptuthe en vèrre sus l'autel dé quat' anges - acouo eune fais illeunminnée par des lampions en bâton.

• L's écrans sont stchulptés auve des belles-toutes-nues (“Jersey Lilies”).

• Nou crait qu'lé font d'bâptême en vèrre est eunnique.