1.

De tout c'que ya
-A mon veu,
A mon seu,
De pus affreux anima -
Chest, ma fé,
Je le cre,
Le vilain moussieu.

(Chorus.)
Oh! la!
Quil anima!

2.

Vilain moussieu
Que pour li
Vit, - jouit.
Bein ne fait que quand i n' peu'!
Sou happer,
Et gober, -
V'là sa vie, à li! -

Oh! la!
Quil anima!

3.

Pour c'menchi don'!
A grugi, -
A s'liqui
Les babinn', coumm' bêt' sans nom,
Goudaler, -
Viyis lé,
A coliq' risqui....

Oh! la!
Quil anima!

4.

Là! un' femm' passe!
O vit' v'lo
Que nout' sot
Ouvr' ses yiers grands coumme eun' tasse.
Pour clienn'ter,
Et s'teurter
Coumme un vier sal' co'! -

Oh! la!
Quil anima!

5.

I' s'est marié
Un biau jour....
Par amour?
O du diantr' si chfut dité!
Tout bouonn'ment
Pour argent
Chfut qu'i fit la cour.

Oh! la!
Quil anima!

6.

Vilain moussieu
Pâl' tréjous
De ses sous,
Vo's fait saver qu'il en meut.
Mais qui' bein
En erveint?
Am' ne sait pus q'nous.

Oh! la!
Quil anima!

7.

De tout le monde
Dir' du ma'
Dam! l'i va:
Là sa lang' d'aspi' abonde.
Fair' la fouée,
Chaq' journée,
Siès li, va av' chla.

Oh! la!
Quil anima!

8.

Vilain moussieu
Met pas d'gants;
Such' ses dents;
Infecte, à vo's tuoner l'coeu;
Est dité,
En effet, -
Dehors....coumm' dédans!

Oh! la!
Quil anima!

9.

Not' anima'
Aim' menti',
Et haï', -
N'sérait pas compliet sans chla.
Chipoteux
Et senteux,
V'là pour le fini'.

Oh! la!
Quil anima!

10.

Chut' être là,
Par ma fé,
Je le cré,
Est le pus affreux qui va.
Yen a-t-i
Pus laid q'li -
Fait's-le mé savé!....

Oh! la!
Quil anima!

L.

Juin, 1866.