Les Pages Jèrriaises

Le Trop Nièd


Jé cré qué l'cidre ès bouon
Si t'uan bé en modération,
Bé zen tou' caû si tu'as du fré dans la tête,
Mais prend m'navis et n'sé bas bête,
Lé trop nièd.

Prôné, 'tu dis, et vèthe
Tu peux prôné si tu y'as affaithe,
Mais n'pâle pon trop d'tan vêsin si n'es pas là
Dé chein qui fait, ny dé chein qu'il a,
Lé trop nièd.

Bein certain'ment tu peux t'proumné,
Fait lé tchicq fais pour té d'sennié;
Mais Courses et “Sports” et tout chonna, garçon
N'arache ni Doque ni Meurdron,
Lé trop nièd.

Tu peux gronné bein seux,
Si tan domestique ès piércheux.
Ronne don doeux cos qui sé r'mètte en travas
Mais la gron'nie, tu vé met l's'esprits bas.
Lé trop nièd.

Yiun des miyieux dit-ons qui yai
Yiun qu'in'vos trompe janmais,
Tchi n'ouet qu'une quioche j'sé bein n'oué qu'un son,
Et pourtant lé pus vrai d'aûtchun dit-on,
Est qué l'trop nièd.

 

Vèrsion modèrnîsée:

Lé Trop Niet

Jé crai qué l'cidre est bouon
si tu'en bai en modéthâtion:
bai-z-en tout caûd si tu'as du fraid dans la tête,
mais prend m'n avis et n'sai pas bête:
lé trop niet.

Prônez, tu dis, et véthe
tu peux prôner si tu y'as affaithe,
mais n'pâle pon trop d'tan vaîthîn s'i' n'est pas là,
dé chein qu'i' fait, ni dé chein qu'il a:
lé trop niet.

Bein certain'ment tu peux t'pronm'ner.
Fai-lé tchiquefais pour té d'sennyer;
mais courses et sports et tout chonna, garçon,
n'êrache ni doque ni meurdron:
lé trop niet.

Tu peux gronner bein seux,
si tan domestique est pièrcheux.
Ronne don deux cos qu'i' s'èrmette en travas.
Mais la gronn'nie, tu vai, met l's esprits bas:
lé trop niet.

Iun des miyeu ditons qu'i' y'ait,
iun tchi n'vos trompe janmais:
Tchi n'ouait qu'eune clioche, j'sai bein, n'ouait qu'un son.
Et pourtant lé pus vrai d'autchun diton:
est qué l'trop niet.


 

Viyiz étout:

 

Les Pages Jèrriaises