Les Pages Jèrriaises

La Slovaquie

La Slovaquie est un pays en Ûrope. Ch'est iun des membres dé l'Unnion Ûropéenne. Sa capitale est Bratislava.

Lé tèrritouaithe d'la Slovaquie d'achteu fut settlé par des Slaves d'vièrs lé chîntchième siècl'ye. Au neuvième siècl'ye chu tèrritouaithe s'trouvit au tchoeu d'l'Empithe d'la Moravie et la Chrêtchienn'té fut êtablyie par les Saints Cyrille et Méthode. Quand ch't' Empithe tchit au dgiêxième siècl'ye, les Hongriens prîntent du tèrrain et du onzième siècl'ye la Slovaque 'tait partie du Rouoyaume d'Hongrie. Bratislava (en Hongrien: Poszony) dévînt la capitale du rouoyaume en 1536.

Quand l'Empithe d'Autriche-Hongrie fut êtablyie en 1867, les Hongriens întroduisîtent eune politique dé Magyarisâtion et la langue Slovaque fut dêcouothagie.

En 1918, les Slovaques fondîtent un êtat en c'mun auve les Tchèques - la Tchécoslovaquie ou la Tchéco-Slovaquie. Coumme ch'est pouor la tchestchion du tithet dans l'nom, les Slovaques né fûtent janmais tout à fait satisfaits auve lé gouvèrnément dé sé dans chutte républyique. Quand l'Accord dé Munich êlopit la Tchécoslovaquie en 1938 les Slovaques prînt la chance d'aver un pays à ieux mais ch'tait raique un êtat-poupette des Nazis.

Auprès la Deuxième Dgèrre Mondiale, la Tchécoslovaquie fut r'formée mais la Slovaquie pèrdit la Ruthénie tch'est achteu en Ukraîne. En 1948 un co d'êtat înstallit les commeunistes au pouvé.

À la siette du R'nouve d'Prague, la Tchécoslovaquie fut changie formellement en fédéthâtion - mais l'pouvé 'tait acouo centralîsé siez les commeunistes - et la Slovaquie d'vînt la Républyique Socialiste Slovaque.

La Révolution dé Vlous en 1989 r'donnit la démocratie au pays, mais des difféthences d'avis entré les Tchèques et les Slovaques (et l'èrtou d'la souô-dîsante dgèrre du tithet - la Tchécoslovaquie ou la Tchéco-Slovaquie) et les difféthentes politiques nécessaithes pouor l's êconomies des deux pays m'nîtent à la s'pathâtion. Lé souô-dîsant Dêmathiage dé Vlous prînt pliaiche au Tchu d'l'An 1992.

(prîns d'la Ouitchipédie en Nouormand et fait sèrvi atout la licence GFDL)

 

Viyiz étout:

 

Les Pages Jèrriaises