I ya occouo d'nos viers Jerriais -
Mais pûzaco d'nos Grouvillais -
Qu'ont bouann' mêmouèr'
Dé la mennièr'
Bâse èt honteuse ov'tchi fut 'rduit'
La p'tit' chapell' Saint'-Marguérit',
A l'heur' dernièr'
D's'n-antiqu' cârièr'.
Mais, sait dit à l'honneu
Dé nos Saint-Martinais
Un servic' bain miyeu -
Pue nobl' fut fait aut'fais
Dé l'ancienn' chapell' Saint'-Cathrenn' -
D'latchell' nou vé occouo la ruènn' :
Nou-z-en fît eun' p'tit' serre à flieurs,
Qu'enbeaumaient dé douoch's odeurs.
Chain qué j'dis là
Est pur'ment vrai,
Car ch'tait bain là,
Jé vos l'dirai,
Qué vivaient deux aimabl's p'tit's flieurs,
Qui brillaient, dam', coum' des verpeurs.
Eun' tout' vieill' grand'-grand'-mèr' -
Qu'a d'yeux eun' bouann' mémouèr',
M'aseur' pour vrai qué ch'tait
Deux fill's - qu'ou connaissait;
Enfin, tch'est qui l'en est,
Chés chièr's p'tit's,
Nou sait pour seux qu'i-l-'taient
Deux Marguérit's !
Mais quoèque'i fûs'nt, coum' jé vos l'dit,
D'la même espèc', ché n'tait qu'bain p'tit
Qu'i s'ersembliaient -
V'chin ch'qu'i-l-en est :
Chèqu' yunn' 'tait occouo jeann'
Et l'aut', dam', né l'tait pas
Quoèqu'ou fûs' bain eun' "Jeann'" -
Chain qu'la jeann' né 'tait pas.
J.D.R.
St.-Sauveux, chu 14 Août 1863.
|
