Oh Dgieu, les nâtions ont envahi t'n héthitage; il' ont avraûné tan saint templ'ye, il' ont mîns Jéthusalem en d'lacres. Il' ont laîssi les cadâvres dé tes sèrvants coumme du mangi pouor l'ouaîth'lîn d'l'air, la chai d'tan peupl'ye pouor l's annimaux du pays sauvage. Il' ont vèrsé du sang coumme dé l'ieau tout l'tou d'Jéthusalem. et n'y'a fis d'âme pouor entèrrer les morts. J'sommes sgornés par nos vaîthîns, motchis et mêprîsis par les cheins l'tou d'nous. Combein longtemps, Seigneu? S'sas-tu mârri pouor tréjous? Combein longtemps qu'ta jalousie brûl'la coumme du feu? Vèrse ta mârrisson sus les nâtions tchi n't'èrconnaissent pon, sus les rouoyaumes tchi n'învôquent pon tan nom; ch'est en tchi il' ont d'vouothé Jâcob et d'vasté san pays. N'ai pon d'èrse contré nous pouor les péchés des généthâtions du pâssé; qu'ta mînséthicorde veinge quédaine nos rencontrer, car j'soummes au d'sans. Aigue-nous, Dgieux not' Saûveux, pouor la glouaithe dé tan nom; d'livre-nous et pardonne nos péchés pouor l'amour dé tan nom. Pouortchi qu'les nâtions dithont "Où'est qu'il est, lus Dgieu?" L'avant à nos ièrs, fai assaver parmi les nâtions qu'tu venge lé sang vèrsé d'tes sèrvants. Qu'les geints des prisonnièrs veingent l'avant à té; atout tan fort bras prêsèrve les condâmnés à mort. Èrpaie dédans nos vaîthîns sept fais l'mêpris qu'i' t'ont fliantchi, Seigneu. Épis nous tan peupl'ye, les brébis d'tan paîssage, té louang'geons à tout janmais; d'généthâtion en généthâtion j'procliâm'thons ta louange.

 

Viyiz étout: