Véthe, mén âme trouve du r'pos dans l'Bouôn Dgieu; man salut veint d'li. Véthe il est man rotchi et man salut; il est ma fortérêsse, jé n's'sai janmais châtchi. Combein longtemps qu'ou m'assâl'lez? Ch'est-i' qu'touos vous, ou m'piqu'thez bas - coumme eune muthâle tchi s'cante, eune cliôtuthe tchi craûle? Pouor lé seux i' sont pouor mé dêjutchi d'man haut lieu; i' lus rêjouissent d'la menn'tie. Atout lus bouoches i' bénissent, mais dans lus tchoeurs i' maudissent. Véthe, mén âme, trouve du r'pos dans l'Bouôn Dgieu, m'n espé veint d'li. Véthe, il est man rotchi et man salut; il est ma fortérêsse, jé n's'sai janmais châtchi. Man salut et m'n honneu dépendent du Bouôn Dgieu; il est man rotchi piêssant, m'n abri. Fi'-ous tréjous en li, vous les gens; vèrsez-li vos tchoeurs, ch'est en tchi l'Bouôn Dgieu est not' abri. Véthe, les cheins d'humbl'ye naîssance sont raîque un soûffl'ye, les cheins d'naîssance êl'vée raîque eune menn'tie. S'i' sont b'sés sus eune balanche, i' n'sont rein; ensembl'ye i' sont raîque un soûffl'ye. Né fi'-ous pon à la fraude, ni au vol; si vos beins abondent, n'y m'ttez nément vos tchoeurs. Lé Bouôn Dgieu a dit eune chose, j'ai ouï deux choses: "Lé pouver t'appartchient, Dgieu, et acanté té, Seigneu, est l'amour tch'enduthe"; et, "Tu rêcompense tout l'monde s'lon chein qu'il' ont fait."
 

Viyiz étout: