Les cieux dêcliathent la glouaithe du Bouôn Dgieu; lé ciel procliâme chein qu'ses mains ont grée. Jour auprès jour i' prêchent au pliaîsi d'la vie; niet auprès niet i' dêchèlent dé la connaîssance. I' n'ont pon d'langue, i' n'font pon sèrvi des mots; nou n'en ouait brîn. Tout coumme lus vouaix s'êtrueûle partoute la tèrre, lus patholes jusqu'ès buts du monde. Dans les cieux l'Bouôn Dgieu a mâté eune tente pouor lé solé. Il est coumme un brûman tchi s'dêhale dé sa chambre, coumme un champion tchi s'rêjouit en couothant sa course. I' s'lève à un but des cieux et fait sa ronde jusqu'â l'aut'; n'y'a rein tch'est au d'sans d'sa caleu. La louai du Seigneu est parfaite, et rafraîchit l'âme. Les régliéments du Seigneu sont fiabl'yes, et bâlent dé la sagesse ès sîmpl'yes. Les prîncipes du Seigneu sont drouaits, et bâlent dé la jouaie au tchoeu. Les c'mandements du Seigneu sont lithants, et êcliaithent les ièrs. La crainte du Seigneu est puthe, et enduthe à janmais. Les jugements du Seigneu sont fèrmes, et touos ieux i' sont justes. I' valent pus qué d'l'or, qué d'l'or bein fîn; i' sont pus doux qu'du myi, qu'du myi du paûmé. S'lon ieux, tan sèrvant est dgèrni; en les gardant y'a eune grande rêcompense. Mais tchi qu'i' peut r'connaît' ses propres fautes? Pardonne mes fautes muchies. Garde tan sèrvant étout des péchés d'la têtouongnise, qu'i' n'mé gouvèrne pon. Épis jé n's'sai pon à bliaûmer, înnocent dé toute mauvaise action. Qu'ches patholes-chîn d'ma bouoche et chutte méditâtion d'man tchoeu saient agriabl'yes quand tu les vai, Seigneu, man Rotchi et man Rédempteu.

 

Viyiz étout: