D'livre-mé, Seigneu, des malfaiteurs; protège-mé des violents, tch'înmaginnent des malîns plians dans lus tchoeurs et êmoûquent dé la dgèrre touos les jours. Il' adguchent lus langues coumme la cheinne d'eune tchilieuvre; lé v'lîn des vipéthes est sus lus lèvres. Garde-mé en seûth'té, Seigneu, des mains des malîns; protège-mé des violents, tch'înmaginnent des trébules pouor mes pids. Les hautains ont muchi un lachon pouor mé; il' ont tendu les cordes dé lus drannet et ont mîns des pièges pouor mé l'long dé man c'mîn. J'dis au Seigneu, "Tu'es man Dgieu." Êcoute, Seigneu, m'n appel pouor la mînséthicorde. Seigneu souvérain, la forche dé man salut, tu protège ma tête lé jour dé la batâle. N'accorde pon ès malîns lus d'si, Seigneu; n'laîsse pon lus plians rêussi. Les cheins tchi m'entouothent ordgilleûthement lèvent lus têtes; qu'la mauvaîtchi d'lus lèvres les engaûme. Qu'des tchèrbons brûlants tchaient sus ieux; qu'i' saient fliantchis dans l'feu, dans des mathes dé pité, sans qu'i' lus en r'lèvent. Qu'des êcliandreurs né saient pon êtablyis dans l'pays; qu'la ruinne chasse les violents. J'sai qu'lé Seigneu asseûthe la justice pouor les pouôrres gens et maintcheint la cause des cheins au d'sans. Ch'est seux qu'les justes louang'geont tan nom, et les dîngnes viv'thont l'avant à ta fache.

 

Viyiz étout: