|
Chétai l'annaie passaie, un jour de mauvais temps, J'étais à la forge, y avait plusieurs gens, Y pâlaient du guano, de chais grosses paunnais, De yeunne surtout, qui fallait un bas hernais; Y disaient que chétai de chu guano, dam! Que Pico faisait v'nin du guano Odam, Oh dam! Pico, yeun se mins à dith', j'aime mus Le sieu de Picot et Benest, y donne pus De pommes-de-terre, et pis y'a le sien de Denis, Car ils ont réussi à faithe une compagnie; Y sont Tom du Becquet, Denis et san biaufreth', Y l'ont dêjà quémanchi lus guano à faith'; Mait' George Biampi, lus vaisin, en fait aitou, Ch'tina bat chent pour chent le sien du Perou. Achteu n'on fait pon de cidre, n'on sait pon trop Qui faith' du prainseu, nou z'y f'tha du guano. Ch'est Bailhache, Lêcaudai, et pis Taff Le Blanc, Orange et Briard, se trouvthont fichis 'dans; Y'a John Philip Tocq, Du Mosch et Jack Le Neveu Ne puourront pon vendre du guano achteu, Et pis Walker, Rutter et oquo Mess Le Sueux, Ne fethont pas du tout mux que le reste d'hieux. Il est vrai de dithe qu'ils ont tuous fait si bain, Qui peuvent bain achteu, vivre sans faithe rain. Les siens qui qu'manchent ne puourront pon faith' ditai, Car le guano à dêjà bain diminuai. Après quicq temps l'guano se trouvi êpuizai, Nou vint sus d'autre chose nou changhi d'sujet; A la Trintai le sujet le plus favori Ch'est quâsi tréjous les affaithes de parti. J'tais le seul de man canon, ils 'taient un fioquet, L'sien qu'avai l'pus à dithe ch'tai Philip Binet. J' étai sus l'auluouge, j'étai sus le cliochi, Les bras hialaient, car y n' aime pon Messervi. "Au point que Mait' Charles Pallot Li dit, Phi-lip-pe, n'en dit pon trop." Car Philip bagoule avec rapiditai, N'on sait pon trop bain quand y dit la véthitai; Quand j'entends "ch'est Philippe Binet qui l'a dit," Je divise par quatre, et pis j'n'en crai qu'la maintchi; Je n'en connaît pon d'autre dans toute l'Ile à l'maitchi. Y dit Vesconte est un honnête homme, Philip Le Vesconte n'a volai personne. La pâtience mêkapi, j'dis Philip tu mens, Tu mens bain des fais pus que d'sarracheurs de dents, Tu dit que "Philip Le Vesconte n'a pon volai"; D' ouest qu'il avait hieu l'argent qu'il a ertuounai? Un' omission, un' erreur, s'fit Philip. A vethe, Je lis dis, tu me crai simple assais pour le craithe, Y rechai de John Perchard deux ans de san Rât, Porte une annaie, l' autre n'la porte pas; Un autre jour ch'est trais qui r'chai de Mait' Josué, Porte une annaie, l'sautres y les gardait. De notre Reine, la prumieth fais, De ses Râts il en erchevait trais; Le même jour, y fait oquo la même faute, Porte une annaie, et deux restent dans sa paute. Deux ans après la même chose se renouvelle, Porte une annaie, d'lautre y n'est pon nouvelle. Et pis de Mousieu Thomas Godfray Une somme d'argent y r'chai; Une partie à un Inspecteur y payi, La balanche y la gardi pour li. Y avait aitou chinquante autres affaithes, Quand nou vint à vais, étaient oquo pus naith'. Charles Bisson des Piatons 'tai taxai à trais, Nou changhi le trais en deux pour yiôtai sa voix. Yia oquo les pierres cassaies, nou dit qui devisent, Quand nou les met a s'nuothail', nou s'entend chain qui disent, Comm' dans une v'licq, dans d'mauvais temps, nou s'entend la mé. La quthiauzitai m'prins un jour, j'em mins à êprouvé; J'en prins une vielle, toute ronde, sans d'faut, Y avait dghix ans qu' ou ruoulait suous les pids des g'vaux; J'la mins à m'nouthaille, j'lentendi criai tout haut, "Oui, chest vrai, par deuz fais j'ai 'tai payie." Ch'tai sus la Vingtaine d'la Croiserie. Une autre, du côtai du Po-du-Roqui, Chetla disait, "quant à mé, j'ai cuoutai bain chi, Les Grandes Routes par quatre fais m'ont payi." Après je prins ma féthaille, je m'en alli, Car Philippe était tout prêt à capuchi. En m'allant j'pensi es siens que j'avais laissi drieth, J'pensi, les siens qui voudraient êcrith, n'en v'la d'la matieth. Quand j'vai Philip de sus l'Câtai, je n'en mentithai pon, J'pense à l'êpu de la citerne à Clem Ernon. Y fut surprins, et vite comme un Lévri, Souantre du LIEVRE, par la f'nêtre y sauti Dans la citerne, et pour des semaines en enthi, Par l'oudeu, nou s'éthai bain peu l'avai suivi; Il a tant bu et tant quothu, qu'en véthitai Il en a le chervai un mio affectai. J'pensi es cigares, il en avait pien ses deux pautes, Y'n fut pon saizi, car il 'tai sous, ch' tai pon sa faute; Y dit, " que nou n'est boutaie que par bête êcônaie." Hélas combain de spree et combain de bordaies Qu'il a yeu, combain d'fais, à la Bagatelle Y s'en est affectai la puoure chervelle. Je lis don'nais un avis; je crai qui devthé Achteu un tout p'tit mio sé modéthé; Car san pèthe avait donnai avis à tuous Ses garçons, y lus avait dit, mais modéthous. San grand lis dis, mais man pèthe, en véthitai, Dans votre jenne temps, étaient-tous modéthai. A John de sus les Cathiaux Je lis don'nais comme avis, De mettre un p'tit pus d'hiau Dans sa bouteille d'hiau-de-vie. Et pis pour un jeune homme V'la qu'in pathais guèthe bain, Tréjous à la forge comme Si ne pouvait'pon faithe rain. Es autres je dithai, que j'natacq personne, mais quand, A la fache, nou m'jette un dêfi, je r'lève le gant. Et si veulent m' entendre pâlai, Y Il' ont qu'à quémanchi entuour mé, Y peuvent conté d'sus, car chest seux, Je ne restéthai pon drieth' yeux. |