De porté ov nous, le dictionnaith de l'Académie.
(Et l'idaie, l'autre jour me vint, que'fallait demandé
Au Président, d'avé le sîen êditai par Littré.)
Quand je dis PH'LIP AUBIN, che n'est pas le pèthe
Car pour le buoun homme, y n'à auqun divilguèthe.
Car pour li dans les Etats
Y né sé hasarde pas
Jamais y n'à proposai
Ni même a ti s'condai
La pus siemple affaithe.
Pour ervenin à son fis
Et au discours qui nos fit
J'en ris ben, je n'en mentithé pon
Et ma fé ch'n'étai pon sans raison.
Y paulle, et ses anmins "l'encore"
Quand ils entendent sa voix "sonore"
Et pis y se mettent tuous a crié
Quand ils l'entendent oquo "rêsonné"
Dans not'Salle
Paroiessiale.
Mais je m'en vais cherchi a explitchi la chose
Qui nos appéli, par le nom de " tamorphose "

J'ai ergardai dans l'dictionnaith siez mé
Et je l'avoue, sans avé peut trouvé
Un itai mot, mais a l'av'nin je ferai coum'li
Car chu jour la, ch'tai sus trais fielliets qui dêjeuni
Et dans d'autres jours, par deux ou trais fais
Y mange quicq' cotelettes des loies
Dans d'autres temps pour changhi la mode
Chest une om'lette fricachie, au vier Code.

Apres avé plusieurs faies ergardai
Je vos ditheai ben chain que j'yai trouvai
Le mot qu'il appelle " Tamorphose "
Et ben j'lai trouvé métamorphosai
En métamorphose
Mais damme la chose
Qui m'a ben frappai.
En l'entendant, car y s'crihai malin
(y dit l'mot coumme du sex' masqulin)
Disant que le l'Chentgni 'tai un vrai tamorphose,
Ne v'la coumme y nos dit la chose.

Avec ches explications, j'em sis décidé
De eherchi un p'tit mio a vos montré
Pour enfin vos explitchi la chose
Que nou z'appelle unne métamorphose.
De vais un petit garson arrêtai
Près de l'Eglise, tout couert de saltai,
Et pis quant a sa tête,
Toute cou'erte de bêtes.
De l'vais dans deux ou trais ans,
Tout ben net, et ben fin et ben fringant,
Tréjous tout prêt a picangni les gens,
"Ma fingre, pour quant a me, ne vla la chose
Que j'appelle unne vraie métamorphose."

Traité un homme de boustre voleux,
Et trais semaines apres, tuous les deux,
Bras d'sus, bras d'sous allant cherchi des voies,
Che fut, dans l'temps même, je lus disais,
"Ma fingre, pour quant a me, ne vla la chose
Que j'appelle unne vraie métamorphose."

Picangni un homme, voulé le vais
Pendu par le co, a un tout haut boie
Comme le Capitaine, voulait aut fais,
Et pis dans un jour, sans auqune raison,
De suite v'nin a changhi s'n'opinion,
"Ma fingre, pour quant a me, ne vla la chose
Que j'appelle unne vraie métamorphose."

Un jeune homme qu'est fort comme deux,
Dans deux jours, malade a faithe peux,
Des gambes fortes coumme un cheva,
Dans quicq' heuthes, toutes couer'tes de ma,
Avé marchi dret coumme un piquet,
Dans p'tit temps avé le dos tout pliet,
Après, n'avé jaumais hieu grand besoin,
De porté auqun bâton dans sa main,
Oblighi d'en avé un gros pour aidghi,
Pour des mais, pour pouvé marchi un p'tit.
"Ma fingre, pour quant a me, ne vla la chose
Que j'appelle unne vraie métamorphose."

Après avé pour longtemps portai moustache
Venin a n'avé rain dutout sus sa fache
Avé hieu unne meinne ben ordinaithe
Venin a réussi de même a s'faithe
Passé pour un homme qui a l'appathence
D'avé acheteu unne grande conséquence
( Les gens disent qui s'est fait de même râzé
Pour sé donné l'air d'être un homme lettré)
"Ma fingre, pour quant a me, ne vla la chose
Que j'appelle unne vraie métamorphose."

Après avé étai un grand conservateur
Se mettre de la Ligue des Réformateurs
(Chutte ligue la, est en ben grande partie
Dss jeunes gens qui voudraient se vais ben pieichies)
Et après pour longtemps avé tout admitheai
Achteu après ch'la voulé vais tout capsizai.
"Ma fingre, pour quant a me, ne vla la chose
Que j'appelle unne vraie métamorphose."

Après avé tant dit sus les Juges payis
Venin dans quiq'semaines a changhi d'avis
Voulant li-même, pour Juge se vais nommai
En pensant d'être ben largement rétribuai.
( Y crai qu'il a hardi de connaissance, car
Y fut a peu près trais mais siez Monsieu Gisfard)
"Ma fingre, pour quant a me, ne vla la chose
Que j'appelle unne vraie métamorphose."

Traité un homme de rosse, le picangni
Que san vier pèthe, n'était qu'un sale Cordongni
Et pis après l'insulté, et tout carraîment
Sus l'Gardin d'Olivet en drait tout l'Regiment
Et trais semaines après, puourr'ait nou l'craithe
De vais l'même homme a l'y fiatté le drieth'
"Ma fingre, pour quant a me, ne vla la chose
Que j'appelle unne vraie métamorphose."
Mais chest que pour quant a l'avenin
Nous li criethea PHILIPPE AUBIN
Le sien qu'à étai
Métamorphosai.