Tout ch'qui l'is n'est pas d'l'or, ch'est un dicton d'tout temps
La leçon n'est pas neuve, un châtchun l'a apprinse!
- Et combein souvent même à ses propres dêpens! -
Mais nou n's'en r'souveint pas: Mêprinse oprès mêprinse
Et malheur sus malheur nos l'font souvent saver.
Nou' s'laisse êgaluer par chein qu'a belle apparence:
Chein qu'a l'air trop coummun nou n'en veurt pon aver
Et, pourtant, ch'est le d'dans qui fait la différence
Mêfi'ous, mes amins, mêfi'ous!
Quand, par exempl'ye, une houmme ov des habits bein faits,
Ov montr'e et chaîne en or, entre dans votr' boutique;
Ne lis f'rous pon crédit? - N'êt'ous pon satisfaits
D'aver un vrai moussieu pour votr' miyeu' pratique?
Votr' garçon s'en ira lis porter ses achats, -
Car les messieux d'nos jours se trouv'raient riditchules
S'ils avaient à porter des pannièrs à lus bras!
Mais rapp'l'ous qu'y'a d'grands gens qui n'ont pas d'grands scrupules!
Mêfi'ous, boutiquièrs, mêfi'ous!
Si votr' père à la banque avait mins deux chents louis;
Ou si, dans votr' coummerce, il y'a tréjous d'la vente;
Si ch'est qu'dans votr' mêtchi les jours sont bein payis;
Si votr' mênage est franc: s'ous avez un mio d'rente;
Enfin assez pour vivre et jamais n'vos gêner,
Et qu'alentou' d'siez vous, quand ch'est qu'la lune êcliaire,
Ou r'mèrquerez souvent votr' vaisine à s'proum'ner:
S'ou' voulez éviter l'mariage et sa minsère
Mêfi'ous, mes garçons, mêfi'ous!
Quand un houmme de loué s'offre à vos prêter des fonds
Et qu'i' veint fouorrer l'nez d'bein près dans vos affaires;
Quand i' n'fait qu'distchuter d'hypothêque et d'coupons
Et vos cons'ille ètou sus tout chein qu'ou' d'vez faire;
Quand d'tiers et d'testaments, d'protchurations et d'frais,
D'cautions et d'endoss'ments i' vos pâ'l'ra sans cesse; -
Erdoubliez d'précautions; ou' vos brûl'rez les daigts
S'ou vos laissiz tenter par chein qui l'intéresse!
Mêfi'ous, mes amins, mêfi'ous!
Quand un houmme, à l'excès, vos montre sa r'ligion;
Qu'i' fait grand cas du temps qu'i' passe à la chapelle;
Qu'il a tréjous des mots pour "l'êdificâtion";
Et pour montrer le qu'min y'où qu'le d'vé nos appelle;
Quand nou vait bein, enfin, qu'ch'est l'pus grand des dévots
Mais qu'étant r'counnaissant qu'san conmmerce est prospère:
I' dounne à s'n'ouvri'yi bieaucoup mains qu'i' n'lis vaut
Et dit qu'i' n'pouorrait pon lis hauchi san salaire:
Mêfi'ous, mes amins, mêfi'ous!
ELIE
|
