Le Ménage ès Feuvres,
St. Ouën.
Lé 17 d'août, 1974.
Moussieu l'Rédacteu,
Quand j'tais mousse siez Papa, l'bouanhomme Maît' Pièrre Choutchet vînt nouos vaie un sanm'di au sé. Papa 'tait justément en train d's'assiéthe dans sa grand' tchaîse au coin d'l'âtre quand il entrit.
Té tchi t'èrconnais dans l's affaithes, lé bouanhomme Pièrre lî dit auprès tch'i' s'était assis, pouorrais-tu m'aviser iou pliaichi des sou à bouan întéthét?
Mais, man pouorre anmîn, Papa li dit, pourtchi t'embêter la tête d'întéthét à t'n âge?
À m'n âge?, s'fit Pièrre. À t'ouï pâler nou créthait qu' j'ai pus d'chent ans et un pid dans la tombe! J'pouorrais acouo sauter per dessus la tête à bein des jannes!
P-t'êt' bein, Papa lî dit, mais Betté Cosnet m'dit l'aut' jour qu' ou ouiyait tes g'nouors cratchi dans la chapelle Dînmanche au sé grand tu té l'vais pour les cantiques. Ou m'dit qu'ou crait qu' tu c'menches à en pèrdre!
Eh bein l'affaithe est belle!, s'fit Pièrre. Qu'ou s'mêle dé ses affaithes, chutte vielle garce-là. Ché n'tait pon mes g'nouors qu'ou ouiyait. Ch'tait l'mousse à Cliément Bailhache tch'était à cratchi des codrettes atout ses dents dans l'banc driéthe mé. Nou pouvait même lé ouï quand il' 'taient à chanter 'La Trompette dé Sion'!
Eh bein, Pièrre, Papa lî dit, n'té mârris pon. Tu sai bein qu' Betté t'admithe hardi et qu' ou prend un grand întéthêt dans ta santé.
Ch'n'est pon d'ma faute si les femmes ont l'yi sus mé. Pièrre lî dit. J'tais un bieau garçon quand j'tais janne. J'n'ai pon changi fort! Mais ch'n'est pon l'întéthêt d'vielles filles tch'i' m'faut - ch'est d'l'întéthêt sus mes sou. Un moussieu a acaté l'mènage au bouanhomme Mess Giraudot tchi mouothit à St. Martîn y'a tchiques mais. S'n hétchitchi est à La Côte et n'voulait pon s'en r'vénîn pour faithe valer la fèrme. Tu d'vais bein l'connaître, lé bouanhomme. Il avait mathié eune Landinne en deuxièmes neuches et 'tait pouorri d'sou. I' mé d'vait eune somme dé rente sus l'assiette du mènage, et l'homme d'affaithes du nouvieau propriêtaithe m'env'yit eune lettre la s'maine pâssée pour mé dithe tch'i' s'en va m'la rembourser dans trais mais.
Est-ch' eune grosse somme dé rente?, Papa lî d'mandit.
Eh bein, i' dit à Papa, jé n'sis pon bein au-fait à cartchuler et jé n'sai pon la valeu en sou, mais j'sai bein tch'i' y'a un siextonnyi d'orge, un d'mié-siextonnyi d'fronment et tchinze-sieziémes dé siextonnyi d'blié moututhe. Jé n'sai pon combein qu' tout chenna fait en louis, mais i' dait y'en aver eune tapée.
Penses : Tchinze fais seize dait êt' hardi! Et pis, au prix qu' tout est à ch't heu, et viyant tch'i' n'y a pon mouoyen d'acater d'blié moututhe dépis qu' les fèrmièrs mett' toutes lus terres en patates, v'la tchi dév'thait valer eune pétite forteune!
Man pouorre garçon, Papa lî dit, n'té gêne pon d'l'întéthêt sus les sou qu' tu r'chèv'thas pour chu rembours-là. Met-les dans la collecte quand tu'îthas à la chapelle. J't'asseûthe qué l'êconome né s'en apperchév'tha mème pon quand i' chang'gea touos les deux-sou en ch'lîns l'lundi matîn.
Eh bein sémnâge!, s'fit Pièrre. Voudrais-tu m'dithe qu'un homme d'affaithes prendrait la peine dé m'êcrithe eune lettre - à la machinne, étout - ch'n'est pon eune lettre ordinnaithe êcrite à la main, et m'faithe aver mes j'veux copés et mett' mes habits du Dînmanche pour aller à la Cour Rouoyale l'ver la main d'vant Moussieu l'Bailli, deux Juges et l'Greffyi si ché n'tait pon pour èrchéver un tas d'sou? J'vai bein qu' tu n t'y r'connais pon autant comme t'en fais la minne. J'm'en vais aller vaie Moussieu L'Boutilyi à High Field. Ch'est li tchi conte les vouaix pour les Louothiers lé jour dévant l's êlections. Quand i' n'y en a pon assez pour gangni l'êlection, il en trouve deux-s trais d'tchique bord pour faithe la majorité, et comme lé Louothi finnit tréjous par en gangni ch'est seux tch'il est fanmeux à cartchuler. I' sétha bein li, combein qu' chutte somme dé rente-là vaut en sou!
Tu'as raison, Pièrre, Papa li dit. Quand tu l'éthas veu, jé s'sai bein content d'saver l'résultat, mais j'té gage qué tu r'chev'thas à bein près assez pour acater eune douzaine dé sûffliets en blianc fé à la boutique siez Mait' Jean L'Feuvre à La Fontaine. Et pis tu pouorras en faithe servi iun pour apprendre à jouer 'Malbrouc s'en va-t-en dgerre, Mironton, tonton, mirontaine' et d'mander à Mait' George Stioûbeutt dé t'laissi jouer dans la musique la séthée d'Guy Fawkes!
J'sai bein qu' tu'es à t'fichi d'mé, Pièrre dit à Papa, mais tchest qu' tu ditha si Moussieu L'Boutilyi m'asseûthe qué ma rente m'apportétha assez d'capita pour emplyi iun des p'tits tambours dé la musique?
Il n'y a rein tchi mé f'thait pus d'pliaisi, man vièr anmîn, Papa lî dit, mais j'té dithai qu' ch'est un mithacl'ye!
George d'La Forge
Viyiz étout: