“P'pèe,” m'dît Douard l'aut' sé: “Si j'allais d'pichi un mitheux, j'éthais-t-i' mauvaise chance pour sept ans? Un mousse m'a dit à l'êcole qu'ieune dé ses couôthînnes en avait d'pichi iun et qu'oulle avait tréjous ieut mauvaise chance dépis. Ou' criyais qu'au but des sept ans, sa bouanne chance èrveindrait, mais ou' crait tch'i' faut qu'oulle aie fait tchiqu'aut' chose tchi lî-a apporté mauvaise chance étout!"
“Eh bein, Douard,” j'lî dis: “J'n'y crai pon, mé, à tout chu niollîn-là, mais l's'anciens y criyaient, ieux! Tu f'thas mus dé d'mander à ta tante Mêrienne, ou à Papa Douard, - i' s'y r'connaissent mus qu'mé.”
“Mais m'mèe séthait p't'êt' lyi!” Jean nouos dît: “Tu sai bein, p'pèe, qu'un jour ou' nouos dît qu'ou' t'avait apprîns quâsi tout ch'qué tu sai!”
“Véthe, Jean,” lî dît Françouais: “Mais ch'tait en riant, qu'ou' l'dît à p'pèe, - m'mèe sait bein qué l's'hommes en savent pus qu'les femmes, valet! Ou' m'l'avouit eune fais qué j'tions touos seurs!”
“Françouais!” sa m'mèe lî dît: “Quand tch'est-che qué 'j't'ai janmais dit d'ité?”
“Mais tu n'té r'souveins pas, don, m'mèe?” Françouais lî dît: “Ch'tait la séthée qué p'pèe t'avait acaté d's'actions à bouan marchi dans la Compangnie des Ieaux, - viyant tch'il avait ouï qu'un homme voulait en vendre pour aver assez d'sou pour s'en aller à la Côte!”
“Eh bein... Vèthe: I' s'pouorrait bein,” Mêrayeu lî dît: “I' faut dithe qué tan pèpèe viyait pus liain qué l'but d'san nez chu jour-là!”
“Françouais,” j'lî dîs: “Comme j'té l'ai tréjous dit, - ta m'mèe est eune femme comme i' n'l'y-en a pon bein des pliaiches!”
“P'pèe,” s'fît Douard: “En as-tu janmais bûchi iun, té, un mitheux?”
“Bon!” j'lî dîs: “Tu penses acouo à chu mitheux-là? Eh bein, man garçon, j'en ai bûchi deux ou trais dans ma vie, - mais v'la tchi n'ma pon apporté mauvaise chance! Quand j'tais mousse, dgia, un garçon tch'allait à l'êcole auve mé en bûchie iun. Ch'tait l'mitheux dans la bouanne chambre à sa m'mèe, et ou' lî baillit eune raide bouanne pitchînne! Nou pouorrait p't'êt' app'ler ch'la aver mauvaise chance! J'm'en r'souveins comme si ch'tait ach't'heu'. Il avait fait eune neuve êlingue et il 'tait à l'êprouver dans l'gardîn en d'vant d'la maiethon. Tout d'un coup i' vit un mouosson sus la branque d'un pomm'yi justément en d'vant d'la f'nêtre dé la bouanne chambre. (Lé pouor' pétit mouosson 'tait jutchi là à êpinotchi des puches souos ieune de ses ailes!) I' r'gardit partout alentou d'li pour eune pétite pièrre. I' n'en trouvit pas ieune, ch'est pourtchi i' dêhallit eune marbre dé d'dans sa paute et la mînt dans s'n'êlingue et mithit sus l'mouosson. I' l'mantchit, et la marbre passit par la f'nêtre et tappit drait dans l'mitan du mitheux et l'bûchit en brédelles! Il eut la chance qu'la f'nêtre fusse ouvèrte, ou bein i' l'éthait bûchie étout!”
“Mais, eu-t-i' mauvaise chance pour sept ans, p'pèe?” Douard mé d'mandit:
“Pas qué j'sache, man garçon,” j'lî rêponnis: “Au contraithe, - il a ieu bouanne chance toute sa vie! Chutte pitchînne-là lî fît du bein, car i' n'r'êprouvit pon à tuer des pouor' pétits ouaiethieaux. Il 'tait au-fait à l'êcole, et pus tard il allit à un Collége d'Agricultuthe en Angliétèrre. Quant i' tchittit l'Collège i' s'n'allit en Améthique et fît forteune à êl'ver des pithots. I' pathaît tch'il en vend des mille touos l's'ans ès grand' hotels!”
“Est-che ch'la qu'nou-s appelle êt' êpithoté, p'pèe?” Jean mé d'mandit:
“Nannîn, man p'tit,” j'lî rêponnis: “Et' êpithoté est eune aut' affaithe, - mais il est temps d'aller t'couochi. J'té dithai tch'est qu'ch'la veur dithe eune aut' fais!”
George d'La Forge
1951
Viyiz étout: