J'n'sis pon très contente à ces sé. Pouortchi? Car j'tais siez man pèthe à la Trinn'té ch'tarlevée, et éyou qu'est man pèthe? I'est à dêfoui les sercl'yes dans l'gardîn. Comme i'fait eune fraid d'tchian anniet i'avait son fischus beige chapé d'laine, qu'i'est plein creux, auvec un poupon sus l'haut. Mais i'n'a pon que deu's trais p'tit mios d'laine restant sus l'poupon. I'a eune mâsse dé magnifiques chapieaux et cravates dans l'armouaithe. Mais i'n'peut pon mettre chenna, ch'est ses habits du dînmanche. J'sis ennyîée d'écouter chenna. I'n'est jamais dînmanche.

Man pèthe est tréjous dans le même chapé, et tout l'temps embarrassé à travailli dans son garage, qu'i'est pliein jusqu'à la porte dé tout t'chi pouor le dînmanche.

Pouor commenchi i'a eune frouque, eune pathe dés souliers, des hauttes bottes et eune branche à tchuithe, janmais faites servi. I'a les combinnaîsons bluis acouo dans eune pouque en plastique. Eune batt'tie pouor avion, pourtchi qu'i'veuthe chenna jé n'sais pon, et sa tinne de Klim qu'i'avait y'eut dans son pachet d'la Crouaix Ruouge duthant l'Otchupâtion.

I'a dans son garage un moto, eune belle ruouge vouaituthe qu'i'l'appel sa MG. Ou n'a pon sorti pouor longtemps, ch'est gardé pouor le dînmanche. Ch'est tout pouor le dînmanche.

Eh bein ch'est comme sa belle blui chiviéthe, qué j'avais donné pouor son jour de naissance y'a quatre ans. I continue à faithe servi la vielle chiviéthe qu'est plieine dé creux. Lé cercl'ye dé la rouelle est rompu et un manchot est cratchi.

A ch'teu jé'n'sais pon tchi qu'il a fait auvec la neuve, mais je crais qu'i'l'a muchie tchique bord et quand il étha fait assez d'sou i'l'es portétha à la banque dedans.

Mais ch'pourrait être un dînmanche d'ja!

Angela Le Pavoux