M's anmîns, j'veurs vos raconter l'histouaithe d'un fèrmyi avare tchi faithait valer eune grande ferme auve sa femme. Il avait trèjous un tas d'gens au travas, mais i' tait si cruel qu'rein n'ervîntent janmais un deuxième jour. Il avait un bailli pour engagi l's ouvriyeurs, mais il 'tait si difficile d'en trouver, qu'à la fîn il avait ieu assez et i' patchit ses valises et fichi l'camp.

L'fèrmyi tachit d'trouver d's hommes pour faithe lé travas li-même mais tout l'monde li dit J'aim'thais mus être pendu qué d'travailli pour vous! Auprès tchiques jours, i'dit à sa femme: J'sis à but! J'emplyéthais bein l'dgiabl'ye comme bailli si j'avais la chance! Rein qu'en l'disant, i'y avait un p'tit moussieu d'vant sa tchaise. Il avait lé pé entre rouoge et nièr, eune barbe et deux p'tites cônes sus sa tête. Lé fèrmyi li d'mandit tchi dgiatre qu'il 'tait. J'sis l'dgiabl'ye. J'm'en vais être vot' bailli. i' dit. L'dgiabl'ye li dit qu'i' travaill'lait pour un an pour rein sauf chein qu'l's ouvriyeurs li donnaient librement.

Bétôt tout 'tait en ordre sus la fèrme. Les saîsons s'pâssîtent, et la récolte 'tait mangnifique. Lé fèrmyi continnuit ses farches; i'fit sèrvi sa badgette sus l's hommes quand i'tait mârri - tchi 'tait bein souvent, et il lus donnit des courts m'suthes.

Auprès douze mais, l'dgiabl'ye vint vaie l'fèrmyi. "J'sis ichîn pour mes gâges," i'dit. "Allons vaie chein qu' l's ouvriyeurs vont m'donner."

Lé fèrmyi s'egouffit d'rithe. "Il' n'ont rein - j'ai fait seu dé chenna - et ous ethez rein pour vot' travas pour ch't année." "Nou verra," réponnit l'dgiabl'ye. En passant l'travèrs du village, ne v'là eune janne fil'ye et san gallant a ardgumenter. Ou li dit, "Si tu n'veurs pon v'nin visiter mes gens auve mé, qué l'dgiabl'ye t'prends." "Hah, v'là vos gages," dit l'fèrmyi. "Mais nânnîn," dit l'd'giabl'ye, "Ch'n'est pon librement donné. Où'est qu'est la hardelle tchi don'na san galant librement au dgiabl'ye?"

Pus liain, un homme et sa femme 'taient a s'entre-disputer. La mèthe dit au pèthe, "Si tu n'veurs pon ammener not' fis à l'êcole, l'dgiabl'ye peut l'prendre!" Acouo eune fais, l'fèrmyi li dit "Vos v'là - un mousse pour vos gages!" "Mais nânnîn - où'est qu'est la mèthe tchi voudrait donner s'n êfant librement au dgiabl'ye?"

Lé fèrmyi rithait acouo pus fort, quand tchiques ouvriyeurs lus dgettitent. I'tait acouo a rithe quand un homme dit "Ne v'là not' bouistre d'maître.Chu baloque! Il est tréjous a tachi d'nos voler nos gages! J'aim'thais li env'yer au dgiabl'ye!" La rith'thie du fèrmyi arretit court. "I' sont a faithe des farches," i'dit. Mais l'dgiabl'ye lus d'mandit, "Voul'ous vraiement m'donner chu fèrmyi? J'ai besoin d'un 'té homme en enfé." "Vèthe-dgia, ou pouvez li aver - et sa grosse femme étout!" 'tait la rêponse. "Mèrcie bein des fais" dit l'dgiabl'ye. "N'en v'là des bouannes gages librement donné!" Et i'stoffit l'fèrmyi et sa femme dans eune grande pouque et lus emportit drait en enfé - et i'sont acouo là, s'lon chein qu'nou m'dit. S'ou n'voulez pon m'craithe, allez vaie à la fèrme - ou à l'autre pliaiche!

TSW