Lé Congrès des Parlers Normands et Jèrriais fut formé pour joindre nos langues, à eune réunion à Carteret en 1996.
En 1998 un groupe dé Jèrriais allitent à Montebourg pour participer à la Fête des Rouaisouns auvec des ércitations et des chansons.
L'année d'auprès, en 1999, ch't'ait l'tou à Jèrri d'értouorner lé complyiment, et ch'la fut fait à 'Hamptonne' quand les d'Gèrnésiais futent invités de v'nin nos joindre, auvec les Nouormands, pour chanté et érciter.
Ch't'année, au mais d'Mai, ch'tait lé tou ès d'Gèrnésiais et y'eu trais jours dé Fête, En tout 25 Jèrriais fitent la traversée, par baté ou avion, pour prendre part ou supporter.
Pour les siens tchi t'est à prendre part leu un 'Vin d'Honneu' dans la Chambre du Bailli à la Cour Royale, et auprès, un r'pas à la 'Manor Hotel' Petit Bot eyou que les Jèrriais 'taient à resté.
Lé Samedi matin à 10 heuthes, eune 'coach' nos emmeni ès Vauxbellets pour c'menchi la fête. Dans la Salle dé l'Ecole 'Blanchlands' y'avait des danseurs dé Bréhal, dé Quetthou, et dé Montebourg assembliés, touos auvec lus belles coeffes, et étout les d'Gèrnésiais et Jèrriais, touos prêt pour faithe lus p'tit mio pour amusé les gens.
L'arlevée, auprès avait bein mangi dans eune grande tente, qui 'tait dans lé Clios dé Sport à côté dé l'Ecole, ieu acouo des chansons, des ércitations, des danses et eune parade d'ancients costumes d'Gèrnésiais.
La sethée s'passit à mangi dans la salle, et à chanté des chansons bein connues qué touos pouvaient joindre dédans.
Dimanche matin, les Jèrriais futent emmenes au Mûsée eyou qu'un filme en d'Gèrnésiais fut montré dans lé thîatre et pis lé Sieur Harry Tomlinson fit un discours sus l'origine dé la Bibliotheque Priault, et lé moussieu tchi l'avait presentée à l'ile en sa memouaithe, tous les ancients livres, et l'histouaithe dé la maison.Vraiment bein intérêssant.
Ertouonnant ès Vauxbellets pour un autre r'pas, et tchique chansons impromptu, y fut bein vite temps d'értouorner pour lé baté. Mercie ès d'Gèrnésiais pour tout lus travas. Eune hardi bouonne fête. Bein organisée.
2000