La Nouvelle Erchette

Lé Président annoncit qué la séthée s'n'allait c'menchi par la pièche dé théâtre dé St. Saûveux, La Nouvelle Erchette, les caractéthes étant: Ph'lippe Lêcaudé (Michael Vautier), Una Lêcaudé, sa femme (Mde. Mabel Le Seelleur), la D'mouaîselle des Vaux, Inspecteu des louages des États pour lé Conmité d'Habitâtion (Mde. Phyllis Green), Missis Èrnon (la Dlle. H. de Veulle), et Missis Le Gros (Mde. Eileen Le Sueur), deux vaîsinnes à Una. La scène: Eune appartément siez Ph'lippe Lêcaudé dans un louage au traîsième êtage du haut bâtisse dans Green Street, dé vièrs siez heuthes du sé. Una est à faithe un patchet; ch'est un cadeau pour les neuches d'argent à san bieau-fréthe. Oulle est changie pour aller s'prom'ner.

La pièche 'tait prîncipalement entouor l'Inspecteu des louages qu'était à vaie les appartéments auprès eune pliainte faite par Missis Le Gros qué y'avait des souothis dans lé bâtisse. Parmi les diffitchultés qué les Lêcaudés sont restés auvec quand l'Inspecteu veint est un tchian dans un pangni qu'i' sont en train d'muchi et eune assiettée d'mangi pour le tchian qué Ph'lippe mange criant qué ch'est san thée. Dans chutte pièche y'a étout Missis Èrnon qui prend la part d'eune charmante vaîsinne.

La séthée continnuit auve la Dlle. Audrey Le Feuvre à r'citer Coumme je m'trouvis et la Dlle. Ruth Amy, Pensées d'à ch't heu, et un dialogue, A tchi lé chouaix, par John B. Germain et Audrey Le Feuvre.

Auprès y'eut eune collecte en faveur des Jersey Home Helps, et un intervalle.

Un' té fricot

La deuxième maintchi c'menchit auve eune èrcitâtion par Mde. Emma Le Mottée, et eune histouéthe par Mde. Amelia Perchard. Lé Sieur Garnet Perchard et John Germain amusîtent l'audience auve Alouette et Frère Jacques en arrêtant pour la pièche dé théâtre dé St. Martîn, Un' té fricot, auve les caractéthes suivants: Charles Rom'thi (l'Sieur Ben Amy), Rachel Rom'thi, sa femme (la Dlle. Ruth Amy), Bella Ouitté (Mde. Ivy Pallot), Élie Ouitté (l'Sieur J. N. Richard), lus anmîns, Mélie, la sèrvante (la Dlle. Audrey Le Feuvre) et l'Docteu Martin (l'Sieur John B. Germain).

La scène: La grand' tchuîsinne siez Charles Rom'thi dé viers siex heuthes et d'mie du sé. La tabl'ye est dréchie pour un r'pas. Rachel entre comme les ridgeaux ouvrent en criyant à Mélie qu'arrive auve des pliats. Charles veint vaie si ch'est qu'lé thée est prêt et y'a eune distchussion entouor lé r'pas (du poulet stoffé auvec des truffl'yes) qué Mélie n'veurt pas mangi mais admet qué lé tchian l'avait aimé hardi.

Les deux coupl'yes finnalement mangent lé r'pas, et un p'tit pus tard la Mélie entre auvec les nouvelles qué l'tchian est mort. I' c'menchent à lus trouver malades, à part d'Élie. I' craient qu'i' sont empouaîsonnés. Lé Docteu Martin veint et lus donnent à tous eune înjection sinon Mélie qui lus dit à la fin qué l'tchian n'a pas 'té empouaîsonné mais êcrasé, et auvec chonna i' rêalisent tous tchi bouanne înmaginnâtion qu'il' ont et qu'i' n'taient pas malades du tout.

La séthée finnit auve les Mêssieux J. N. Richard et B. J. Amy à chanter Sus l'air du tra de ri de ra.

Lé Président èrmèrcyit tous qu'avaient prîns part et tous qu'étaient v'nus lus supporter, est l'Connêtablye pour la salle.

1971
 

Viyiz étout:

• L'Assembliée d'Jèrriais
• La Nouvelle Èrchette
• Un Té Fricot