La rêunion mensuelle eut lieu vendrédi, l'28 dé novembre, dans la Salle Publyique dé St. Martîn et dans les huiptante membres lus y rêunîtent.
D'vant c'menchi les affaithes, l'Président, l'Sénateu P. J. Romeril, d'mandit ès membres dé lus l'ver et obsèrver eune minute dé silence en mémouaithe dé Mde. A'court.
Lé rapport du jeu d'cartes du mais d'octobre fut liu et accepté. Siex nouvieaux membres fûtent êlus.
Lé Président, auprès l's affaithes finies, dit qu'la séthée avait 'té annoncée comme des items dé l'Eisteddfod mais y'avait des artistes des deux pièches dé théâtre qui n'pouvaient pas v'nîn. Il espéthait qu'les membres s'saient pas trop d'sappointés auve chein qu'avait 'té arrangi.
Preunmiéthement des r'citations par la Dlle. Audrey Le Feuvre, Mde. Emma Le Mottée, Mde. Enid de Gruchy et la Dlle. Ruth Amy.
Auprès, l'Sénateu Romeril montrit des portraits prîns à Lamballe, à Caën, Southampton et en Dgèrnésy.
Les danmes du Conmité Exétchutif et d'autres servîtent du thée et galettes à tous à la fîn.
Lé Président èrmèrcyit l'Connêtabl'ye Billot pour la salle et les siens qu'avaient prîns part, les danmes pour lé souper et les membres pour être v'nus, et espéthait qu'il' avaient passé eune bouanne séthée souos les circonstances.
Lé Connêtabl'ye èrmèrcyit l'Président et dit qué dans autchun temps les membres dé L'Assembliée 'taient les beinv'nus.
1969
Viyiz étout: