Jeudi, lé 15 dé juillet, les membres du Conmité Dramatique 'taient à l'Aéroport à neuf heuthes et d'mie à rencontrer et faithe la beinv'nue ès tchînze danseurs dé L'Assembliée d'Guernesiais.
Auprès eune tâssée d'café i' fûtent siez les membres du conmité qui les acc'modaient pour la niet, et i' rencontrîtent tous à Nièrmont entre 12 heuthes et 12 heuthes 45 pour un pique-nique, qui fut un grand succès. La veue du Portelet, avec toute sa côte et la Tour Janvrîn, et la mé d'eune couleur dé bliu spéciale à Jèrri 'taient eune scêne qué les Dgèrnésiais et les membres du conmité né pouôrront janmais oublier.
Chutte pétite compangnie rencontrit les membres dé L'Assembliée près dé la Salle dé St. Pierre à 2 heuthes et d'mie et, montant dans les deux vouaituthes auvec les Dgèrnésiais et Jèrriais bein mêlangis ensembl'ye, i' fûtent pour eune mangnifique touônnée d'campagne, arrêtant à La Pot'tie pour faithe des acats et prendre eune tâssée d'thée, r'arrivant à St. Pierre à 6 heuthes.
I' fallait sé r'trouver tous à l'Aéroport dé vièrs 7 heuthes et d'mie pour souper à 8 heuthes, un souper qui fut hardi apprêcié par toute la compagnie.
Auprès lé souper, lé Président fit la beinv'nue ès Dgèrnésiais et env'yit les complyiments d'L'Assembliée à Mdne Heaume auprès s'n opéthâtion. Lé rapport du mais d'mai fut liu et accepté, chînq nouvieaux membres fûtent êlus et lé Président annoncit la rêunion mensuelle vendrédi, lé 27 d'août, auvec Mde. Joan Stevens dans la Salle dé St. Jean.
Les affaithes finies, Mde. M. J. de la Haye, présidente du Conmité Dramatique, dit deux mots en ouvrant lé concert qué les Dgèrnésiais étaient touos prêts à donner, car il' avaient trouvé lus hauts chapieaux et d'paille qui compliétaient les supèrbes robes des danmes et l'appathance des mêssieux avec lus longues câsaques, blianches braies et des rouoges êliets dans lus boutonniéthes, un mangnifique spectacl'ye d'aut'fais. Moussieu M. Torode, en chèrge des danseurs, èrmèrcyit les Jèrriais pour lus beinv'nue et dit qu'il apportait les complyiments dé lus Présidente, Mde. Heaume, et qu'oulle espéthait d'les vaie lé mais d'septembre.
Auprès i' dansîtent plusieurs anciennes danses et y'avait des chansons et èrcitations en Français, Angliais et Dgèrnésiais, et des spécials chants et cantiques en Angliais et Français par “Eddie”, qui fit grand pliaîsi ès Jèrriais.
Mde. Eileen Le Sueur, coumme est s'n habitude, èrcitit eune risibl'ye pétite histouaithe d'eune vielle Jèrriaise en embarras avec un Angliais, et les membres du Conmité Dramatique et tchiques autres chantîtent des chansons étout.
Les apprêciâtions et èrmèrciéments fûtent exprînmés par Mde. M. J. de la Haye et lé Connêtabl'ye W. J. Tomes la r'mèrcyit et san conmité pour lus travas, et les Dgèrnésiais pour la bouanne séthée qué tous avaient ieu, et chenn'chîn am'nit eune mémorabl'ye journée à sa fin dé vièrs onze heuthes 45.
1976
Viyiz étout: