Au mais d'Dézembre 2000, un nouvieau livre fut lanchi par Le Don Balleine : "Mille Ditons en Jèrriais".
Un grand nombre dé gens lus assemblyîtent dans la Salle des Membres dé La Société Jersiaise où'est qu'les éditeurs du livre - lé Juge Max Lucas, lé Sieur Laurie Hueûlîn et l'Pâsteur Brian Vibèrt - 'taient à sîngni les livres pouor les cheins tch'en acataient.
Nou's-avait attendu bein longtemps pouor la publyicâtion d'chu livre, et l'travas d'assemblier touos les ditons et d'en trouver les êtchivalents en Angliais et en Français (ou d'les traduithe) avait duthé bein d's années.
Lé Pâsteur Brian Vibèrt èrmèrcyit ses collègues et învitît l'Bailli d'lanchi lé livre.
Messire Philip Bailhache, Bailli d'Jèrri, prononcit un discours pouor lanchi lé livre et i' r'mèrtchit coumme tchi qu'lé Jèrriais est bein pus apprécié coumme l'héthitage dé l'Île qu'i' y'a tchiques années.
 Messire Philip Bailhache, Bailli d'Jèrri |
Lé Bailli, pâlant pustôt en Angliais, dît qu'nou-s'a prédit la mort d'not vielle langue pouor un si long temps qu'les entrepranneurs daivent êt' lâssés d'attendre. L'întéthêt dans l'Jèrriais a 'té ravigotté dans les dreines années, grâce ès actions du Sénateu Jean Le Maistre dans l's Êtats et d's aut's gens en d'hors d'l'assembliée. Nou n'est pon acouo seu si l'ensîngnage du Jèrriais dans l's êcoles primaithes es'sa renforchi, mais l'înmportant, ch'est d'aggrandi l'nombre des chein tchi l'pâlent à seule fîn qu'i' d'veinge un véthitâbl'ye mouoyen d'commeunnicâtion autrément qué dans des carres d'la campangne où'est qu'i' vit acouo et prospéthe.
|
Ch'tait raide bein d'ouï pâler l'Bailli coumme chennechîn et d'aver d'l'encouothagement 'officiel' pouor l's êfforts des cheins tchi travâlent si dû pouor not' langue et not' tchultuthe.
Viyiz étout: